រាជធានីភ្នំពេញ កម្ពុជា – ថ្ងៃទី៥ ខែវិច្ឆិកា ឆ្នាំ២០២៦ - ខណៈពេលដែលបច្ចេកវិទ្យាបញ្ញាសិប្បនិម្មិត (AI) កំពុងតែបង្កើនឥទ្ធិពលកាន់តែខ្លាំងឡើងលើរបៀបដែលមនុស្សស្វែងរក និងវាយតម្លៃលើម៉ាកយីហោ ថ្នាក់ដឹកនាំផ្នែកទំនាក់ទំនងមកពីជុំវិញតំបន់អាស៊ីកំពុងជម្រុញ និងដាស់តឿនដល់បណ្តាអាជីវកម្មទាំងឡាយឱ្យសម្លឹងមើលឱ្យឆ្ងាយជាងត្រឹមតែភាពមើលឃើញ ហើយចោទសួរថា តើអ្វីទៅដែលធ្វើឱ្យម៉ាកយីហោមួយមានគុណតម្លៃសមនឹងទទួលបានការទុកចិត្ត និងការជ្រើសរើសពិតប្រាកដ។

នេះជាខ្លឹមសារសំខាន់នៃកិច្ចពិភាក្សានៅក្នុងកម្មវិធី វេទិកាទំនាក់ទំនងតំបន់ឆ្នាំ២០២៦ (OAC Regional Communications Forum 2026) ដែលបានប្រព្រឹត្តទៅកាលពីថ្ងៃទី៥ ខែវិច្ឆិកា នៅទីក្រុងហូជីមិញ ប្រទេសវៀតណាម។ វេទិកានេះបានប្រមូលផ្តុំអ្នកជំនាញផ្នែកម៉ាកយីហោ និងទំនាក់ទំនងមកពីទីផ្សារចំនួន ១៣ ក្នុងតំបន់អាស៊ី រួមទាំងប្រទេសកម្ពុជាផងដែរ ដើម្បីពិភាក្សាអំពីអត្ថន័យ និងឥទ្ធិពលនៃបច្ចេកវិទ្យាបញ្ញាសិប្បនិម្មិតចំពោះអាជីវកម្ម និងឧស្សាហកម្មទំនាក់ទំនងទាំងមូល។

ប្រព័ន្ធវេទិកាដែលដំណើរការដោយបច្ចេកវិទ្យាបញ្ញាសិប្បនិម្មិត កំពុងតែក្លាយជាប្រភពថ្មីមួយទៀត ដែលអ្នកប្រើប្រាស់ស្វែងរកព័ត៌មាន។ ប៉ុន្តែចម្លើយដែលបានឆ្លើយដោយបច្ចេកវិទ្យាបញ្ញាសិប្បនិម្មិត មិនមែនមានន័យថា ម៉ាកយីហោនោះត្រូវបានតំណាងឱ្យយ៉ាងសុក្រិតត្រឹមត្រូវ ឬទទួលបានការទុកចិត្តនោះឡើយ។ ចម្លើយទាំងនោះត្រូវបានដកស្រង់ចេញពីប្រភពជាច្រើន ដូច្នេះគុណភាព ភាពស៊ីសង្វាក់គ្នា និងភាពជឿជាក់នៃវត្តមានរបស់ម៉ាកយីហោដ៏ទូលំទូលាយ គឺមានសារៈសំខាន់ជាងអ្វីៗទាំងអស់។

អ្នកស្រី Ivy Nhi Chau ស្ថាបនិក និងជាអគ្គនាយិកានៃក្រុមហ៊ុន Ivy+Partners ប្រទេសវៀតណាម បានបញ្ជាក់ថា៖ “កេរ្តិ៍ឈ្មោះត្រូវបានបង្កើតឡើងមិនមែនត្រឹមតែតាមរយៈអ្វីដែលមនុស្សបានឃើញនៅលើប្រព័ន្ធអនឡាញប៉ុណ្ណោះទេ ប៉ុន្តែក៏ត្រូវរួមបញ្ចូលទាំងទំនាក់ទំនងជាមួយភាគីពាក់ព័ន្ធ និងបទពិសោធន៍ជាក់ស្តែងក្នុងពិភពពិតផងដែរ។ សម្រាប់ម៉ាកយីហោនានា សំណួរមិនមែនស្ថិតនៅត្រង់ថា តើបញ្ញាសិប្បនិម្មិតបានលើកឡើងពីពួកគេដែរឬទេនោះទេ ប៉ុន្តែវាស្ថិតនៅត្រង់ថាតើការបង្ហាញទាំងនោះវាបានឆ្លុះបញ្ចាំងពីកេរ្តិ៍ឈ្មោះដ៏គួរឱ្យជឿជាក់ដែលត្រូវបានកសាងឡើងតាមរយៈសកម្មភាព និងទំនាក់ទំនងដែលមានភាពស៊ីសង្វាក់គ្នាកម្រិតណា”។

បញ្ញាសិប្បនិម្មិតអាចជួយបង្កើនល្បឿនក្នុងការស្រាវជ្រាវ និងការផលិតមាតិកា។ ប៉ុន្តែ នៅពេលដែលគ្រប់គ្នាសុទ្ធតែប្រើប្រាស់ឧបករណ៍ស្រដៀងៗគ្នា ដោយគ្មានយុទ្ធសាស្ត្រច្បាស់លាស់ វានឹងធ្វើឱ្យការប្រាស្រ័យទាក់ទង និងការបញ្ជូនសារបាត់បង់ភាពខុសប្លែក និងភាពលេចធ្លោរបស់ខ្លួន។ លោក Ong Hock Chuan ដៃគូគ្រប់គ្រងនៃក្រុមហ៊ុន Maverick ប្រទេសឥណ្ឌូនេស៊ី បានកត់សម្គាល់ថា ទិន្នន័យនៃភាពមើលឃើញ គឺមានប្រយោជន៍ លុះត្រាតែ វាផ្តល់ជាព័ត៌មានសម្រាប់ការសម្រេចចិត្តអំពីការកំណត់គោលដៅរបស់ម៉ាកយីហោ ខ្លឹមសារមាតិកា និងអាទិភាពនៃការទំនាក់ទំនង។

គុណតម្លៃរបស់បញ្ញាសិប្បនិម្មិត គួរតែត្រូវបានវាស់វែងដោយមិនផ្អែកលើបរិមាណមាតិកាដែលវាអាចផលិតបាននោះទេ ប៉ុន្តែគួរតែវាស់វែងលើកម្រិតដែលវាអាចជួយកសាងម៉ាកយីហោមួយឱ្យមានភាពគួរឱ្យជឿជាក់ មានភាពស៊ីសង្វាក់ និងមានលក្ខណៈប្លែកគេពីគេ។

តំបន់អាស៊ីមិនមែនជាទស្សនិកជនតែមួយនោះឡើយ។ ភាសា ការយោងទៅលើវប្បធម៌ ទម្លាប់នៃការប្រើប្រាស់ប្រព័ន្ធផ្សព្វផ្សាយ និងការរំពឹងទុករបស់ភាគីពាក់ព័ន្ធ គឺមានភាពខុសប្លែកគ្នាពីទីផ្សារមួយទៅទីផ្សារមួយទៀត ហើយសារដែលមានប្រសិទ្ធភាពនៅក្នុងប្រទេសមួយ អាចនឹងផ្តល់លទ្ធផលខុសគ្នាដាច់ស្រឡះនៅក្នុងប្រទេសមួយទៀត។ បញ្ញាសិប្បនិម្មិតអាចជួយម៉ាកយីហោនានាក្នុងការកែច្នៃ និងចែកចាយសារក្នុងទំហំធំបាន ប៉ុន្តែការយល់ដឹងអំពីទីផ្សារក្នុងស្រុក គឺជាអ្វីដែលធ្វើឱ្យសារទាំងនោះមានភាពស៊ីសង្វាក់ និងទទួលបានការទុកចិត្ត។
អ្នកស្រី ផេង គឹមហ៊ន អគ្គនាយិកាក្រុមហ៊ុន TWPR Communication បានបង្ហាញទស្សនៈថា៖ “បញ្ញាសិប្បនិម្មិតអាចជួយឱ្យម៉ាកយីហោនានាត្រូវបានគេចាប់អារម្មណ៍ ប៉ុន្តែទំនុកចិត្តគឺត្រូវបានកសាងឡើងតាមរយៈការយល់ដឹងពីទីផ្សារក្នុងស្រុក ទំនាក់ទំនងជាមួយប្រព័ន្ធផ្សព្វផ្សាយដែលគួរឱ្យទុកចិត្ត និងភាពស៊ីសង្វាក់គ្នានៃសកម្មភាពក្នុងរយៈពេលវែង។ សម្រាប់ទស្សនិកជននៅកម្ពុជា ការដែលសារមួយត្រូវបានចែកចាយដោយរបៀបណា និងដោយនរណា គឺមានសារៈសំខាន់ជាជាងសារនោះទៅទៀត”។

សម្រាប់ម៉ាកយីហោនៅកម្ពុជា ឱកាសគឺស្ថិតនៅលើការរួមបញ្ចូលគ្នារវាងសមត្ថភាពរបស់បច្ចេកវិទ្យាបញ្ញាសិប្បនិម្មិត ជាមួយនឹងការវិនិច្ឆ័យរបស់មនុស្ស ការយល់ដឹងអំពីវប្បធម៌ និងការកសាងទំនាក់ទំនង។ ទោះបីជាបញ្ញាសិប្បនិម្មិត អាចផ្លាស់ប្តូររបៀបដែលម៉ាកយីហោត្រូវបានស្វែងរកក៏ដោយ ក៏ការទទួលបានទំនុកចិត្តនៅតែជាកិច្ចខិតខំប្រឹងប្រែងរបស់មនុស្ស និងការយល់ដឹងច្បាស់ពីបរិបទក្នុងស្រុកដដែល។

អំពី One Asia Communications (OAC)
One Asia Communications (OAC) គឺជាសម្ព័ន្ធយុទ្ធសាស្ត្រនៃទីភ្នាក់ងារឯករាជ្យផ្នែកទំនាក់ទំនងសាធារណៈ និងទីផ្សារ ដែលគ្រប់គ្រងដោយម្ចាស់ផ្ទាល់នៅទូទាំងទ្វីបអាស៊ី។ OAC ត្រូវបានបង្កើតឡើងក្នុងគោលបំណងផ្សារភ្ជាប់ទីផ្សារអាស៊ីដ៏ចម្រុះគ្នា តាមរយៈដំណោះស្រាយឆ្លងព្រំដែនប្រកបដោយភាពរលូន។ បណ្តាញនេះរួមបញ្ចូលគ្នានូវឧត្តមានុវត្តន៍ជាសកល ជាមួយនឹងការយល់ដឹងស៊ីជម្រៅអំពីបរិបទក្នុងស្រុក និងជំនាញជាក់ស្តែងនៅក្នុងតំបន់។ OAC ជួយឱ្យម៉ាកយីហោនានាអាចដោះស្រាយបញ្ហាស្មុគស្មាញនៅក្នុងតំបន់អាស៊ីប៉ាស៊ីហ្វិក ដោយនៅតែរក្សាបាននូវភាពបត់បែន ការយកចិត្តទុកដាក់ផ្ទាល់ខ្លួន និងការដឹកនាំដោយផ្ទាល់នៅនឹងកន្លែង ដែលជាលក្ខណៈពិសេសរបស់ទីភ្នាក់ងារឯករាជ្យទាំងនោះ។
អំពី TWPR Communication (TWPR)
TWPR គឺជាទីភ្នាក់ងារឈានមុខគេមួយនៅរាជធានីភ្នំពេញ ប្រទេសកម្ពុជា ដែលផ្តល់សេវាកម្មពេញលេញលើផ្នែកទំនាក់ទំនងទីផ្សារចម្រុះ និងការច្នៃប្រឌិត។ ដោយផ្អែកលើការយល់ដឹងស៊ីជម្រៅអំពីបរិបទក្នុងស្រុក និងបណ្តាញទំនាក់ទំនងដ៏រឹងមាំជាមួយប្រព័ន្ធផ្សព្វផ្សាយព្រមទាំងអ្នកសារព័ត៌មាន TWPR មានជំនាញឯកទេសលើការរៀបចំផែនការទំនាក់ទំនងជាយុទ្ធសាស្ត្រ ទីផ្សារឌីជីថល ការរចនាប្រកបដោយភាពច្នៃប្រឌិត ទំនាក់ទំនងសាធារណៈ និងការរៀបចំព្រឹត្តិការណ៍ផ្សេងៗ។
ចប់
សម្រាប់ការសាកសួរប្រព័ន្ធផ្សព្វផ្សាយ
ក្រុមហ៊ុន TWPR Communication Co., Ltd.
លោក សុខ សារ៉ាក់
ទូរស័ព្ទ៖ (+855) 78 289 974
អ៊ីម៉ែល៖ sarak@twpr360.com




