មន្រ្តីការទូតជាន់ខ្ពស់ ក៏ដូចជាមន្ត្រីការពារជាតិរបស់កូរ៉េខាងត្បូង និងសហរដ្ឋអាមេរិកបានយល់ស្របដូចគ្នាថា កិច្ចសហប្រតិបត្តិការយោធាកូរ៉េខាងជើង-រុស្ស៉ី គឺរំលោភបំពានយ៉ាងធ្ងន់ធ្ងរលើទណ្ឌកម្មរបស់អង្គការសហប្រជាជាតិ (UN) ហើយពួកគេត្រូវតែតបស្នងនូវតម្លៃ។
អនុរដ្ឋមន្ត្រីការបរទេសកូរ៉េខាងត្បូង លោក ចាង ហូជីន (Chang Hojin) បានប្រាប់សន្និសីទសារព័ត៌មានថា «យើងបានយល់ព្រមធ្វើការរួមគ្នា ដើម្បីធានាថានឹងមានការតបស្នងនូវតម្លៃណាមួយ ចំពោះការរំលោភយ៉ាងធ្ងន់ធ្ងរលើ ដំណោះស្រាយរបស់ក្រុមប្រឹក្សាសន្តិសុខ»។ រីឯ អនុរដ្ឋមន្រ្តីការពារជាតិអាមេរិក លោកស្រី សាស្យា បាឃឺ (Sasha Baker) បាននិយាយថា សម្ព័ន្ធមិត្តទាំងអស់នឹងកំណត់អត្តសញ្ញាណ លាតត្រដាង និងប្រឆាំងរាល់ការប៉ុនប៉ងរបស់រុស្ស៉ី ដើម្បីទទួលបានឧបករណ៍យោធាសម្រាប់ធ្វើសង្គ្រាមនៅអ៊ុយក្រែន។
លោក ចាង និងអនុរដ្ឋមន្ត្រីការបរទេសអាមេរិក លោកស្រី បុននី ជេនឃីន (Bonnie Jenkins) ក៏បានលើកឡើងផងដែរថា ការប្រើប្រាស់អាវុធនុយក្លេអ៊ែរណាមួយរបស់កូរ៉េខាងជើងលើកូរ៉េខាងត្បូង នឹងទទួលការឆ្លើយតបយ៉ាងរហ័ស និងលើសលប់។
គួរបញ្ជាក់ថា សហរដ្ឋអាមេរិក និងកូរ៉េខាងត្បូងបារម្ភថា កូរ៉េខាងជើង មានបំណងអនុញ្ញាតឲ្យរុស្ស៉ីទទួលបានគ្រាប់រំសេវ ដើម្បីបំពេញស្តុកឃ្លាំងរបស់ខ្លួន។ ក្រុមមន្ត្រីដែលកំពុងជួបប្រជុំគ្នានៅទីក្រុងសេអ៊ូល បានអំពាវនាវឲ្យទីក្រុងមូស្គូបង្ហាញការទទួលខុសត្រូវ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខ UN៕
ប្រភព Reuters ប្រែសម្រួលដោយគិរីដងរែក
