ក្នុងជំនួបបាល់ទាត់ពានរង្វាន់ផ្នែកនារីរវាងក្លិប SPORTING LISBON និង Benfica គេបានឃើញអាជ្ញាកណ្តាលផ្តល់កាតពណ៌ ស។
អ្នកគាំទ្របាល់ទាត់ធ្លាប់តែឃើញកាតលឿង និងក្រហមដើម្បីពិន័យដល់កីឡាកររូបណា ដែលបង្កកំហុសប៉ុន្តែពួកគេ នឹងមិនទម្លាប់ជាមួយកាតពណ៌សនេះទេ។
នៅពេលក្លិប Benfica នាំមុខ ៣-០, កីឡាការិនីនៅកៅអីបម្រុង ត្រូវបានគេរាយការណ៍ថា មានបញ្ហាសុខភាពនៅចុងតង់ទី១។
គ្រូពេទ្យមកពីក្រុមទាំងសងខាង បានប្រញាប់ប្រញាល់ទៅជួយកីឡាការិនីរូបនោះ។បន្ទាប់ពីបញ្ហាត្រូវបានដោះស្រាយអាជ្ញាកណ្តាល ស្រាប់តែលើកកាតពណ៌ ស ឲ្យគ្រូពេទ្យទាំង២តែម្តង។
ចុះតើកាតពណ៌សនេះ មានន័យដូចម្តេច?
កាតពណ៌ស គឺជាផ្នែកមួយនៃគំនិតផ្តួចផ្តើមថ្មីនៅក្នុងប្រទេសព័រទុយហ្គាល់។
មិនដូចកាតលឿងនិងក្រហមដែលជាការដាក់ពិន័យនោះទេ ផ្ទុយទៅវិញ កាត ស គឺត្រូវបានផ្តល់ឲ្យដើម្បីជាការទទួលស្គាល់ និងសរសើរដល់ក្លិបសម្រាប់ការលេង Fair-Play។
គំនិតថ្មីនេះ ត្រូវបានចាប់ផ្តើមដើម្បីជំរុញតម្លៃសីលធម៌នៅក្នុងវិស័យកីឡា៕
ប្រភព The Sun ប្រែសម្រួលដោយគីរីដងរែក
