គៀវ ៖ អ៊ុយក្រែនបាននិយាយថា គោលដៅដ៏ធំសម្រាប់កិច្ចចរចាសន្តិភាពទល់មុខគ្នាជាលើកដំបូងជាមួយរុស្ស៊ីក្នុងរយៈពេលជាងពីរសប្តាហ៍នេះ គឺផ្ដោតសំខាន់លើបទឈប់បាញ់ បើទោះជាការរពឹងកិច្ចព្រមព្រៀងសន្តិភាពបញ្ចប់សង្រ្គាមអាចនឹងត្រូវចំណាយពេលយូរក៏ដោយ។
ប៉ុន្តែមុននឹងជំនួបចាប់ផ្ដើម មន្ត្រីជាន់ខ្ពស់ម្នាក់មកពីក្រសួងការបរទេសអាមេរិក បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន មិនទាន់ត្រៀមខ្លួនដើម្បីផ្ដល់ការសម្រុះសម្រួល ឬក៏ផ្ដល់សម្បទានការបញ្ចប់សង្រ្គាមនៅឡើយទេ ខណៈក្រុមមន្ត្រីអ៊ុយក្រែនក៏មានការសង្ស័យដូចគ្នានេះដែរ។
ក្រុមប្រតិភូចរចាមកពីខាងភាគីអ៊ុយក្រែន ត្រូវបានគេរាយការណ៍ថាបានធ្វើដំណើរទៅដល់ទីក្រុងអ៊ីស្ដង់ប៊ូល ប្រទេសតួកគីហើយ ដើម្បីចូលរួមក្នុងកិច្ចចរចា ជាមួយភាគីខាងរុស្ស៊ី ដែលគ្រោងនឹងធ្វើឡើងនៅថ្ងៃអង្គារនេះ។
សូមជម្រាបថា កាលពីថ្ងៃចន្ទដើមសប្ដាហ៍នេះ លោក ហ្សេលេនស្គី បានឱ្យដឹងថាអ៊ុយក្រែនបានត្រៀមខ្លួនរួចរាល់ហើយ ដើម្បីពិភាក្សាពីលក្ខន្តិកអព្យាក្រឹត និងការធានាថាអ៊ុយក្រែនមិនមានអាវុធនុយក្លេអ៊ែរ ជាមួយរុស្ស៊ី។ តែលោកក៏បញ្ជាក់ដែរថារាល់កិច្ចព្រមព្រៀងណាមួយជាមួយមូស្គូ នឹងត្រូវឆ្លងកាត់ការបោះឆ្នោតប្រជាមតិជាមុនសិន៕
ABC news ប្រែដោយគីរីដងរែក
