រុស្សីកំពុងស្វែងរកការចូលជាសមាជិកក្រុមប្រឹក្សាសិទ្ធិមនុស្សរបស់អង្គការសហប្រជាជាតិឡើងវិញ ដែលនៅសប្តាហ៍នេះ បានចោទប្រកាន់កងកម្លាំងរបស់ទីក្រុងម៉ូស្គូ ពីបទប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន។
ក្រុមប្រឹក្សានេះបានបណ្តេញរុស្ស៊ីកាលពីឆ្នាំមុនបន្ទាប់ពីការលុកលុយពេញទំហឹងពីប្រទេសជិតខាងរបស់ខ្លួន ប៉ុន្តែឥឡូវនេះវាត្រូវបានចុះបញ្ជីនៅលើគេហទំព័ររបស់អង្គការសហប្រជាជាតិជាបេក្ខជនសម្រាប់ការបោះឆ្នោតសម្រាប់អាណត្តិ 2024-2026 ដែលនឹងប្រព្រឹត្តទៅនៅថ្ងៃទី 10 ខែតុលា។
សមាជិកភាពនៃក្រុមប្រឹក្សាគឺផ្អែកលើការបែងចែកភូមិសាស្ត្រសមធម៌ ដោយមានអាសនៈទំនេរចំនួនពីរនៅក្នុងក្រុមតំបន់រដ្ឋអឺរ៉ុបខាងកើត នេះបើយោងតាមអង្គការសហប្រជាជាតិ។ ប្រទេសរុស្ស៊ី រួមជាមួយនឹងអាល់បានី និងប៊ុលហ្គារី ត្រូវបានចុះបញ្ជីថាបានប្រកាសបេក្ខភាពរបស់ពួកគេសម្រាប់តំបន់នោះ។
រុស្ស៊ី «ជឿថា វាមានសារៈសំខាន់ក្នុងការទប់ស្កាត់និន្នាការកើនឡើងនៃការប្រែក្លាយក្រុមប្រឹក្សាសិទ្ធិមនុស្សទៅជាឧបករណ៍ ដែលបម្រើដល់ឆន្ទៈនយោបាយរបស់ប្រទេសមួយក្រុមដែលដាក់ទណ្ឌកម្មរដ្ឋាភិបាលដែលមិនស្មោះត្រង់ចំពោះគោលនយោបាយឯករាជ្យផ្ទៃក្នុង និងខាងក្រៅរបស់ពួកគេ»។
ការចោទប្រកាន់អំពីឧក្រិដ្ឋកម្មសង្គ្រាម៖ កាលពីដើមសប្តាហ៍នេះ ស្ថាប័នអង្គការសហប្រជាជាតិបាននិយាយថា មាន “ភស្តុតាងជាបន្តបន្ទាប់” ដែលថាកងកម្លាំងរុស្ស៊ីកំពុង “ប្រព្រឹត្តឧក្រិដ្ឋកម្មសង្គ្រាមនៅអ៊ុយក្រែន” ។
វាបានចោទប្រកាន់ថា កងកម្លាំងរុស្ស៊ីបានប្រព្រឹត្ត “ការវាយប្រហារខុសច្បាប់ដោយប្រើអាវុធជាតិផ្ទុះ ការវាយប្រហារដែលបង្កគ្រោះថ្នាក់ដល់ជនស៊ីវិល ការធ្វើទារុណកម្ម អំពើហិង្សាផ្លូវភេទ និងយេនឌ័រ និងការវាយប្រហារលើហេដ្ឋារចនាសម្ព័ន្ធថាមពល”។
រុស្ស៊ីបានបដិសេធការចោទប្រកាន់ពីបទឧក្រិដ្ឋកម្មសង្រ្គាម ហើយអះអាងថាកម្លាំងរបស់ខ្លួនមិនបានកំណត់គោលដៅជនស៊ីវិលទេ។ ប៉ុន្តែអ្នកសារព័ត៌មាន CNN នៅលើទឹកដីនៃប្រទេសអ៊ុយក្រែន បានឃើញភស្តុតាងដោយផ្ទាល់នៃអំពើឃោរឃៅនៅទីតាំងជាច្រើននៅទូទាំងប្រទេស។
ប្រភព CNN ប្រែសម្រួលដោយគិរីដងរែក
