រុស្សុីបាញ់ទម្លាក់មីសុីល៣គ្រាប់របស់អ៊ុយក្រែន

(មូស្គូ)៖ អភិបាលតំបន់រុស្ស៉ីជាប់ព្រំដែនអ៊ុយក្រែន បាននិយាយថា យ៉ាងហោចណាស់មនុស្សម្នាក់បានរងរបួស នៅក្នុងតំបន់បែលហ្គូរូដ (Belgorod) ដែលស្ថិតនៅឯភាគខាងត្បូងប្រទេស បន្ទាប់ពីកងកម្លាំងរុស្ស៊ីបានបាញ់ទម្លាក់មីស៊ីលចំនួន ៣គ្រាប់នៅថ្ងៃចន្ទនេះ។ នេះបើយោងតាមការចុះផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី៦ ខែមីនា ឆ្នាំ២០២៣។

លោក វីយ៉ាឆេសលេវ គ្លេដកូវ (Vyacheslav Gladkov) អភិបាលតំបន់បែលហ្គូរូដ បានឲ្យដឹងតាមបណ្តាញតេឡេក្រាមថា កម្ទេចកម្ទីដែលធ្លាក់ចុះមក ប៉ះពាល់ដល់ខ្សែបណ្តាញអគ្គិសនីមួយចំនួននៅជិតទីប្រជុំជនណូវី អូសកូល (Novy Oskol) ប៉ុន្តែទំហំនៃការខូចខាតនៅមិនទាន់ដឹងនោះទេ។ លោក គ្លេដកូវ បានគូសបញ្ជាក់ថា ««គេគ្រាន់តែបានដឹងថា មានមនុស្សម្នាក់រងរបួសត្រង់ដៃ»។

អភិបាលតំបន់រូបនេះ មិនបាននិយាយពីអត្តសញ្ញាណរបស់អ្នកបាញ់មីស៊ីលនេះទេ ប៉ុន្តែកន្លងមកបានចោទប្រកាន់កងកម្លាំងអ៊ុយក្រែន ដែលស្ថិតនៅម្ខាងទៀតនៃព្រំដែនក្បែរនោះ សម្រាប់ការវាយប្រហារស្រដៀងគ្នានេះ។ ចំណែក អ៊ុយក្រែនស្ទើរតែមិនដែលប្រកាសទទួលខុសត្រូវជាសាធារណៈ ចំពោះការវាយប្រហារនៅក្នុងប្រទេសរុស្ស៊ី ឬនៅលើទឹកដីដែលគ្រប់គ្រងដោយរុស្ស៊ីនៅអ៊ុយក្រែននោះទេ។

គួរបញ្ជាក់ថា តំបន់ Belgorod មានព្រំប្រទល់ជាប់នឹងតំបន់ខាកៀវ (Kharkiv) របស់អ៊ុយក្រែន ហើយធ្លាប់រងការបាញ់ប្រហារម្តងហើយម្តងទៀត ចាប់តាំងពីមានការឈ្លានពានរបស់រុស្ស៊ីលើអ៊ុយក្រែន កាលពីឆ្នាំ២០២២៕

ប្រភព AFP ប្រែសម្រួលដោយគិរីដងរែក