កងទ័ពអ៊ុយក្រែន បានទៅដល់ចក្រភពអង់គ្លេសហើយ ដើម្បីរៀនពីរបៀបប្រើ និងថែទាំរថក្រោះ ដែលទីក្រុងឡុងដ៍ សន្យាផ្តល់ទៅឲ្យទីក្រុងកៀវ ដើម្បីគាំទ្រការប្រយុទ្ធរបស់ខ្លួន ប្រឆាំងនឹងរុស្ស៊ី។
ក្រសួងការពារជាតិអង់គ្លេស បានបង្ហោះ Twitter កាលពីថ្ងៃអាទិត្យទី២៩ខែមករាថា “ក្រុមរថក្រោះអ៊ុយក្រែន បានមកដល់ចក្រភពអង់គ្លេសហើយ ដើម្បីចាប់ផ្តើមការហ្វឹកហ្វឺនសម្រាប់ការបន្តប្រយុទ្ធរបស់ពួកគេប្រឆាំងនឹងរុស្ស៊ី”។
ក្នុងការបង្ហោះនោះ ក៏មានភ្ជាប់ជាមួយនូវរូបថត២សន្លឹក ដែលបង្ហាញទាហានអ៊ុយក្រែន ចុះពីយន្តហោះផងដែរ។
កងទ័ពអ៊ុយក្រែន ចុះពីយន្តហោះកាលពីថ្ងៃព្រហស្បតិ៍ មន្ត្រីការពារជាតិអង់គ្លេសមួយរូបបាននិយាយថា ប្រទេសរបស់លោកនឹងចាប់ផ្តើមការហ្វឹកហ្វឺននៅថ្ងៃចន្ទទី៣០ខែមករា។
គួរបញ្ជាក់ជាថ្មី អង់គ្លេស នឹងផ្តល់ រថក្រោះធុន Challenger 2 ដល់អ៊ុយក្រែន ហើយក្រោយមក សហរដ្ឋអាមេរិក និងអាល្លឺម៉ង់ ក៏ប្តេជ្ញាផ្តល់រថក្រោះទៅឲ្យទីក្រុងកៀវ ផងដែរ។
មុននេះ ឯកអគ្គរដ្ឋទូតរបស់ទីក្រុងមូស្គូ ប្រចាំសហរដ្ឋអាមេរិក បានព្រមានថា រថក្រោះប្រយុទ្ធរបស់អាមេរិក ដែលបញ្ជូនទៅកាន់អ៊ុយក្រែន នឹងត្រូវបំផ្លាញដោយកងកម្លាំងរុស្ស៊ី។
លោក Anatoly Antonov និយាយថា វិធានការបញ្ជូនរថក្រោះទៅអ៊ុយក្រែន នឹងធ្វើឲ្យអាមេរិកចូលរួមមួយកម្រិតទៀតនៅក្នុងជម្លោះ៕
ប្រភព Express.com.uk ប្រែសម្រួលដោយគិរីដងរែក
