រាជរដ្ឋាភិបាលកម្ពុជាកំណត់វិស័យយានយន្ត និងអេឡិចត្រូនិកជាវិស័យអាទិភាពដ៏មានសក្តានុពលសម្រាប់ការលើកកម្ពស់ការចូលរួមរបស់កម្ពុជាក្នុងខ្សែច្រវ៉ាក់តម្លៃសកល។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំស្តីពីការរៀបចំផែនទីបង្ហាញផ្លូវសម្រាប់ការអភិវឌ្ឍន៍ និងការទាក់ទាញការវិនិយោគលើវិស័យយានយន្ត និងអេឡិចត្រូនិក។
កិច្ចប្រជុំដែលបានធ្វើឡើងតាមប្រព័ន្ធអនឡាញនៅថ្ងៃទី ១៩ ខែមេសា មានការចូលរួមពីក្រុមការងារអន្តរក្រសួង និងដៃគូអភិវឌ្ឍន៍។
ឯកសារចំនួនពីរត្រូវបានរៀបចំឡើងដោយបង្ហាញពីចក្ខុវិស័យរយៈពេលវែងរបស់រដ្ឋាភិបាល ជាពិសេសគំនិតផ្តួចផ្តើមសម្រាប់ការអភិវឌ្ឍន៍វិស័យរថយន្ត និងអេឡិចត្រូនិច។
ទីមួយគឺ “ផែនទីបង្ហាញផ្លូវសម្រាប់ការអភិវឌ្ឍន៍ និងការទាក់ទាញនៃការវិនិយោគផ្នែកយានយន្ត” ដោយមានគោលបំណងអភិវឌ្ឍ និងភ្ជាប់វិស័យយានយន្តកម្ពុជា ទៅនឹងខ្សែច្រវ៉ាក់តម្លៃក្នុងតំបន់ និងពិភពលោក ហើយជាពិសេសគឺប្រែក្លាយកម្ពុជាទៅជាមជ្ឈមណ្ឌលផលិតគ្រឿងបន្លាស់រថយន្ត ក៏ដូចជាជំរុញការផលិតគ្រឿងបន្លាស់រថយន្តដែលស្មុគស្មាញ និងមានតម្លៃបន្ថែម។
ទីពីរគឺ “ផែនទីបង្ហាញផ្លូវសម្រាប់ការអភិវឌ្ឍន៍ និងការទាក់ទាញនៃការវិនិយោគក្នុងវិស័យអេឡិចត្រូនិក” ក្នុងគោលបំណងប្រែក្លាយកម្ពុជាទៅជាមជ្ឈមណ្ឌលផលិតគ្រឿងអេឡិចត្រូនិកដែលរួមបញ្ចូលគ្នាយ៉ាងខ្ពស់ ដែលផលិតគ្រឿងបន្លាស់អេឡិចត្រូនិចយ៉ាងទូលំទូលាយ គ្រឿងបន្លាស់ពាក់កណ្តាលសម្រេច និងផលិតផលសម្រេច ដើម្បីបម្រើដល់តំបន់ និង ទីផ្សារនាំចេញសកល។
លោក អូន ព័ន្ធមុនីរ័ត្ន បានស្នើដល់ក្រសួង ស្ថាប័នពាក់ព័ន្ធ បន្តសហការជាមួយដៃគូអភិវឌ្ឍន៍ និងពិនិត្យមើលឡើងវិញនូវសេចក្តីព្រាងផែនទីបង្ហាញផ្លូវ ស្របតាមស្មារតីនៃអង្គប្រជុំ មុននឹងដាក់ជូនរដ្ឋាភិបាលអនុម័ត។
ដោយគីរីដងរែក
