Fulham ដណ្ដើមបានកៅអីទៅក្របខណ្ឌ Premier League សាជាថ្មី ក្រោយឈ្នះ Preston North End ដោយលទ្ធផល៣ទល់នឹង០ ក្នុងការប្រកួតសប្ដាហ៍ទី៤២ នៃក្របខណ្ឌ Championship។
តាមពិតទៅ ក្រុមលោក Marco Silva មានឱកាសវិលទៅលីគកំពូលអង់គ្លេសតាំងពីសប្ដាហ៍មុន តែបានចាញ់ Derby County ១ទល់នឹង២។ ទន្ទឹមនឹងនេះ Aleksandar Mitrovic រកបាន៤០គ្រាប់ពីការចូលលេង៤០លើកសម្រាប់ Fulham។
Fulham បានធ្លាក់ពី Premier League នាដំណាច់រដូវកាលមុន។ ឆ្លងកាត់ការប្រកួត៤២លើក Fulham មាន៨៦ពិន្ទុឈរកំពូលតារាង ពីលើក្រុមលេខ២ Bournemouth ដែលលេងបាន៤១ប្រកួត ចំនួន៩ពិន្ទុ។
ក្នុងចំណោម៥រដូវកាលចុងក្រោយ Fulham ដែលជាជើងឯករង Europa League ២០១០ ឡើងទៅ Premier League ៣ដង និងធ្លាក់២ដង៕
ដោយគីរីដងរែក
