យោងតាមមន្ត្រីអាមេរិកពីរនាក់បាននិយាយថា បុគ្គលិកអាមេរិកបានរងរបួសនៅក្នុងការវាយប្រហារដោយមីស៊ីលផ្លោងលើមូលដ្ឋានអាកាស Al-Asad ក្នុងប្រទេសអ៊ីរ៉ាក់។ ទីបញ្ជាការកណ្តាលរបស់សហរដ្ឋអាមេរិក (CENTCOM) បានបញ្ជាក់ថា កាំជ្រួចផ្លោង និងគ្រាប់រ៉ុក្កែតជាច្រើនបានកំណត់គោលដៅលើមូលដ្ឋាន ហើយខណៈពេលដែលភាគច្រើនត្រូវបានស្ទាក់ចាប់ ខ្លះបានធ្វើឱ្យមានផលប៉ះពាល់។ មន្ត្រីទាំងពីរបាននិយាយថាការវាយប្រហារនេះ បានបណ្តាលឲ្យមានរបួសស្រាលប៉ុន្តែមិនទាន់ដឹងថាមានបុគ្គលិកប៉ុន្មាននាក់បានរង របួស។នៅក្នុងសេចក្តីថ្លែងការណ៍មួយ CENTCOM បាននិយាយថាបុគ្គលិកមួយចំនួន “កំពុងស្ថិតក្រោមការវាយតម្លៃសម្រាប់ការប៉ះទង្គិចខួរក្បាល” ។
ការវាយប្រហារចាប់តាំងពីថ្ងៃទី ៧ ខែតុលា៖ ការវាយប្រហារថ្ងៃសៅរ៍នេះ ហាក់ដូចជាមីស៊ីលផ្លោងជាលើកទី ២ ដែលត្រូវបានប្រើដើម្បីតម្រង់គោលដៅរបស់សហរដ្ឋអាមេរិក និងកងកម្លាំងចម្រុះនៅក្នុងប្រទេសអ៊ីរ៉ាក់ ចាប់តាំងពីថ្ងៃទី ៧ ខែតុលា ឆ្នាំ ២០២៣ នៅពេលដែលកងជីវពល Shia គាំទ្រដោយអ៊ីរ៉ង់ បានចាប់ផ្តើមបើកការវាយប្រហារលើមូលដ្ឋានសម្ព័ន្ធ បន្ទាប់ពីការចាប់ផ្តើមនៃ សង្គ្រាមនៅហ្គាហ្សា។ អាមេរិក និងកងកម្លាំងចម្រុះបានរងការវាយប្រហារច្រើនជាង 140 ដងនៅក្នុងប្រទេសអ៊ីរ៉ាក់ និងស៊ីរីចាប់តាំងពីពេលនោះមក ខណៈដែលកងជីវពល Shia គាំទ្រដោយអ៊ីរ៉ង់បានបាញ់បង្ហោះដ្រូន និងគ្រាប់រ៉ុក្កែតម្តងហើយម្តងទៀត។ ការប្រើប្រាស់កាំជ្រួចមីស៊ីលផ្លោងដែលមានថាមពលខ្លាំងជាង – កម្រជាងគ្រាប់រ៉ុក្កែត ឬយន្តហោះគ្មានមនុស្សបើកវាយប្រហារ – កើតឡើងនៅពេលដែលមានភាពតានតឹងក្នុងតំបន់កើនឡើង នៅពេលដែលសង្រ្គាមឆ្លងកាត់ 100 ថ្ងៃ។
ក្រុមតស៊ូអ៊ីស្លាមនៅអ៊ីរ៉ាក់ជា ក្រុមជីវពលគាំទ្រដោយអ៊ីរ៉ង់បានអះអាងទទួលខុសត្រូវចំពោះការវាយប្រហារដោយមីស៊ីល។ ក្រុមនេះបានសង្កត់ធ្ងន់នៅក្នុងសេចក្តីថ្លែងការណ៍មួយកាលពីថ្ងៃសៅរ៍ពីការប្តេជ្ញាចិត្តរបស់ខ្លួនក្នុងការទប់ទល់នឹង “កងកម្លាំងកាន់កាប់” របស់អាមេរិកនៅក្នុងតំបន់ ហើយបានលើកឡើងពីការវាយប្រហារថាជាការឆ្លើយតបទៅនឹងអ្វីដែលពួកគេហៅថា “ការសម្លាប់រង្គាលរបស់អង្គភាព Zionist” ប្រឆាំងនឹងប្រជាជនប៉ាឡេស្ទីននៅក្នុងតំបន់ហ្គាហ្សា។ កងកម្លាំងអាមេរិកនៅអ៊ីរ៉ាក់ និងស៊ីរីប្រតិបត្តិការជាផ្នែកមួយ នៃ ក្រុមចម្រុះដើម្បីកម្ចាត់ក្រុម ISIS។ នៅក្នុងសេចក្តីថ្លែងការណ៍មួយ អ្នកតំណាងពិសេសរបស់អគ្គលេខាធិការអង្គការសហប្រជាជាតិប្រចាំប្រទេសអ៊ីរ៉ាក់បានព្រមានថា តំបន់នេះគឺស្ថិតនៅក្នុង “ចំណុចប្រសព្វដ៏សំខាន់” ដែលផ្តើមចេញពីសង្រ្គាមនៅហ្គាហ្សា ដែលប្រថុយនឹងអូសទាញអ៊ីរ៉ាក់ចូលទៅក្នុងជម្លោះ។
សេចក្តីថ្លែងការណ៍បាននិយាយថា “ទោះបីជាមានការខិតខំប្រឹងប្រែងរបស់រដ្ឋាភិបាលក្នុងការទប់ស្កាត់ការកើនឡើងនៃភាពតានតឹងក៏ដោយ ការវាយប្រហារនៅតែបន្ត – មានប្រភពមកពីក្នុង និងក្រៅព្រំដែនរបស់ប្រទេសអ៊ីរ៉ាក់ឈរដើម្បីបំបាត់ស្ថិរភាពដែលពិបាកទទួលបានរបស់ប្រទេសនិងសមិទ្ធិផលដែលខ្លួនបានធ្វើក្នុងប៉ុន្មានឆ្នាំថ្មីៗនេះ” ។ កាលពីថ្ងៃចន្ទ ភាគខាងជើងប្រទេសអ៊ីរ៉ាក់ គឺជាគោលដៅនៃការវាយប្រហារមីស៊ីលផ្លោង ដោយកងឆ្មាំបដិវត្តន៍អ៊ីស្លាមរបស់អ៊ីរ៉ង់ សម្រាប់ការមានអ្វីដែលអង្គការនេះបាននិយាយថា គឺជាមូលដ្ឋានចារកម្មសម្រាប់ទីភ្នាក់ងារស៊ើបការណ៍សម្ងាត់របស់អ៊ីស្រាអែល Mossad ។ សហរដ្ឋអាមេរិកបានថ្កោលទោសការវាយប្រហារនេះថាជាការមិនប្រុងប្រយ័ត្ន និងមិនច្បាស់លាស់។
ប្រភព CNN ប្រែសម្រួលដោយគិរិដងរែក
