(ឡុងដ៍)៖ អ្នកចាំទី Edouard Mendy របស់ក្លិប Chelsea បានទទួលការវះកាត់ លើម្រាមដៃ ដែលបានបាក់ ក្នុងអំឡុងពេលហ្វឹកហាត់ នៅសប្តាហ៍នេះ, នេះបើយោងតាមសារព័ត៌មាន BBC ចេញផ្សាយនាយប់ថ្ងៃទី៧ ខែមករា ឆ្នាំ២០២៣នេះ។
អ្នកចាំទីសញ្ជាតិសេណេហ្គាល់ វ័យ៣០ឆ្នាំរូបនេះ មិនបានលេងឲ្យក្លិបតោខៀវនោះទេ ចាប់តាំងពីវិលត្រឡប់មកពីប្រកួត នៅឯព្រឹត្តិការណ៍ World Cup ដោយសាររបួសស្មា ដែលលោកបានរងរបួស នៅប្រទេសកាតា ជាទីកន្លែងដែលពួកគេបានចាញ់ ក្នុងវគ្គ១៦ក្រុមចុងក្រោយ ក្រោមថ្វីជើងក្រុមអង់គ្លេស។
អ្នកចាំទីសញ្ជាតិអេស្ប៉ាញ Kepa Arrizabalaga បានលេងជំនួសអស់៣ប្រកួតហើយ សម្រាប់ក្លិប Chelsea។
Chelsea កំពុងស្ថិតនៅចំណាត់ថ្នាក់ទី១០ ក្នុងតារាងលីគ Premier League បន្ទាប់ពីចាញ់១-០ កាលពីថ្ងៃព្រហស្បតិ៍ ក្រោមថ្វីជើងក្រុម Manchester City៕
ប្រភព BBC ប្រែសម្រួលដោយគីរីដងរែក
