(លីសបន)៖ អ្នកចាត់ការក្លិប Sporting Lisbon លោក Ruben Amorim ជាបេក្ខភាពម្នាក់ ក្នុងចំណោមអ្នកប្រកួតប្រជែងសំខាន់ ដើម្បីបន្តតំណែងពីលោក Steven Gerrard ក្នុងនាមជាអ្នកចាត់ការក្លិប Aston Villa។ នេះបើយោងតាមសារព័ត៌មាន BBC ចេញផ្សាយនាថ្ងៃទី២៥ ខែតុលា ឆ្នាំ២០២២។
លោក Gerrard ត្រូវបានបណ្តេញចេញពីតំណែងនៅថ្ងៃព្រហស្បតិ៍សប្តាហ៍មុន បន្ទាប់ពីកាន់តួនាទីមិនទាន់បានពេញ ១ឆ្នាំនោះទេ ក្រោយពីការប្រកួតចាញ់ ៣-០ ក្រោមថ្វីជើងក្រុម Fulham។
លោក Amorim វ័យ ៣៧ឆ្នាំ ត្រូវបានគេដឹងថា Villa បានជជែកជាមួយនឹងអ្នកតំណាងរបស់លោក។
យ៉ាងណាក៏ដោយ ក្លិប Villa មានអ្នកប្រកួតប្រជែងជាច្រើនរូបទៀតដែលចាប់អារម្មណ៍ ក្នុងតួនាទីជាអ្នកចាត់ការនេះ។
លោក Amorim បានដឹកនាំក្លិប Sporting Lisbon ដណ្តើមបានពានរង្វាន់ Primeira Liga ជាលើកដំបូងរបស់ពួកគេក្នុងរយៈពេល ១៩ឆ្នាំ នៅរដូវកាល២០២០-២១។
គួរជម្រាបថា Villa បានចាប់ផ្តើមយុគសម័យ ក្រោយការដឹកនាំរបស់លោក Gerrard ក្រោមការដឹកនាំជាបណ្តោះអាសន្នដោយលោក Aaron Danks ជាមួយនឹងលទ្ធផលឈ្នះ ៤-០ ក្នុងនាមជាម្ចាស់ផ្ទះលើក្រុមភ្ញៀវ Brentford ដែលនាំឲ្យពួកគេឈរនៅចំណាត់ថ្នាក់ទី១៤ ក្នុងលីគ Premier League៕
ប្រភព BBC ប្រែសម្រួលដោយគីរីដងរែក
