បេសកកម្មរបស់អ៊ីរ៉ង់ប្រចាំអង្គការសហប្រជាជាតិបាននិយាយកាលពីថ្ងៃព្រហស្បតិ៍ថា ការចាំបាច់សម្រាប់ទីក្រុងតេអេរ៉ង់ក្នុងការ “ដាក់ទណ្ឌកម្ម” អ៊ីស្រាអែលចំពោះការវាយប្រហារដ៏សាហាវទៅលើស្ថានកុងស៊ុលអ៊ីរ៉ង់នៅទីក្រុងដាម៉ាសកាលពីសប្តាហ៍មុន អាចត្រូវបានជៀសវាង ប្រសិនបើការវាយប្រហារនេះត្រូវបានថ្កោលទោសនៅអង្គការសហប្រជាជាតិ។
“ប្រសិនបើក្រុមប្រឹក្សាសន្តិសុខអង្គការសហប្រជាជាតិបានថ្កោលទោសចំពោះទង្វើឈ្លានពានរបស់របប Zionist មកលើទីតាំងការទូតរបស់យើងនៅទីក្រុង Damascus ហើយត្រូវបាននាំយកមកកាត់ទោសជនល្មើសជាបន្តបន្ទាប់ នោះការចាំបាច់សម្រាប់អ៊ីរ៉ង់ក្នុងការដាក់ទណ្ឌកម្មរបបដ៏អាក្រក់នេះប្រហែលជាត្រូវបានលុបចោល” ។
អគ្គលេខាធិការអង្គការសហប្រជាជាតិលោក Antonio Guterres បានថ្កោលទោសការវាយប្រហារកាលពីថ្ងៃទី 1 ខែមេសា នេះបើយោងតាមសេចក្តីថ្លែងការណ៍របស់អ្នកនាំពាក្យអង្គការសហប្រជាជាតិលោក Stephan Dujarric ។ ការពិភាក្សារបស់ក្រុមប្រឹក្សាសន្តិសុខត្រូវបានធ្វើឡើងនៅថ្ងៃទី 2 ខែមេសា ដើម្បីពិភាក្សាអំពីការវាយប្រហារនេះ ប៉ុន្តែភាពខុសគ្នាក្នុងចំណោមសមាជិកបានរារាំងសកម្មភាពផ្លូវការ ឬការថ្កោលទោសមិនឲ្យកើតឡើង។
សហរដ្ឋអាមេរិកកំពុងមានការប្រុងប្រយ័ត្នខ្ពស់ និងរៀបចំយ៉ាងសកម្មសម្រាប់ការវាយប្រហារ “សំខាន់” ដោយអ៊ីរ៉ង់ សំដៅលើទ្រព្យសម្បត្តិរបស់អ៊ីស្រាអែល ឬអាមេរិកនៅក្នុងតំបន់ ដើម្បីឆ្លើយតបទៅនឹងការវាយប្រហារនៅទីក្រុង Damascus ដែលបានសម្លាប់មេបញ្ជាការកំពូលអ៊ីរ៉ង់។
ប្រភព CNN ប្រែសម្រួលដោយគិរីដងរែក
