(អ៊ីស្លាម៉ាបាដ)៖ មេដឹកនាំជាន់ខ្ពស់មកពីគណបក្ស និងប៉ូលីសបាននិយាយថា ខ្មាន់កាំភ្លើងម្នាក់បានបើកការបាញ់ប្រហារទៅលើរថយន្តកុងតឺន័រមួយ ដែលដឹកអតីតនាយករដ្ឋមន្ត្រីប៉ាគីស្ថាន លោក Imran Khan កាលពីថ្ងៃព្រហស្បតិ៍ ដោយបានធ្វើឱ្យគាត់រងរបួសបន្តិចបន្តួច និងអ្នកគាំទ្ររបស់គាត់ផងដែរ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី០៣ ខែវិច្ឆិកា ឆ្នាំ២០២២។
មន្ត្រី បក្ស លោក Asad Umar និយាយ ថា លោក Khan បាន រង របួស ត្រង់ ជើង តែ មិន ធ្ងន់ធ្ងរ នោះ ទេ។
ការវាយប្រហារនេះបានកើតឡើងនៅក្នុងស្រុក Wazirabad នៃខេត្ត Punjab ភាគខាងកើត ខណៈដែលលោក Khan កំពុងធ្វើដំណើរតាមក្បួនរថយន្តឆ្ពោះទៅកាន់រដ្ឋធានី Islamabad ដែលជាផ្នែកនៃយុទ្ធនាការរបស់លោក ក្នុងគោលបំណងបង្ខំឱ្យរដ្ឋាភិបាលរៀបចំការបោះឆ្នោតមុនកាលកំណត់។
គួរបញ្ចាក់ថា ចាប់តាំងពីការបណ្តេញ លោក Khan ចេញពីតំណែងនៅក្នុងការបោះឆ្នោតដកទំនុកចិត្តនៅក្នុងសភាកាលពីខែមេសា លោកបានចោទប្រកាន់ថា ការបណ្តេញចេញពីតំណែងរបស់លោកគឺជាការសមគំនិត ដែលបង្កើតឡើងដោយអ្នកស្នងតំណែងលោកនាយករដ្ឋមន្ត្រី Shahbaz Sharif និងសហរដ្ឋអាមេរិក៕
ប្រភព AFP ប្រែសម្រួលដោយគីរីដងរែក
