សួ វិចិត្រ នឹងប៉ះជាមួយជើងខ្លាំង ៣រូបទៀត ក្នុងវគ្គផ្តាច់ព្រ័ត្រនៅថ្ងៃអាទិត្យនេះ។

(សិល្បៈ)៖ លទ្ធផលនៃវគ្គពាក់កណ្តាលផ្តាច់ព្រ័ត្រនៃកម្មវិធីប្រលងចម្រៀងដ៏ល្បី Beat The Best បានរកឃើញ ជើងខ្លាំង ៤រូប សុទ្ធតែបុរសដើម្បីឈានទៅដើម្បីជ័យលាភីនៅក្នុងវគ្គផ្តាច់ព្រ័ត្រ នៅថ្ងៃអាទិត្យចុងសប្តាហ៍នេះ។

តាមរយៈការផ្សាយផ្ទាល់កាលពីរាត្រីថ្ងៃអាទិត្យ ទី២០ ខែកុម្ភៈ ឆ្នាំ២០២២ តាមរយៈសម្លេងសារគាំទ្រពីទស្សនិកជនក្នុងចំណោមបេក្ខជនបេក្ខនារី ៦រូប គឺមានតែ ៤រូបប៉ុណ្ណោះដែលទទួលបានសម្លេងសារគាំទ្រច្រើន ដែលរួមមាន បេក្ខជន សួ វិចិត្រ, បេក្ខជន ឈាន ជាលឿយ, បេក្ខជន ពេជ្យ ម៉េងលី និងបេក្ខជន អ៊ីម ថៃ ។

ជើងខ្លាំងទាំង៤នេះ សុទ្ធសឹងជាបេក្ខជនដែលមានទាំងសមត្ថភាព និងប្រជាប្រិយភាព ប៉ុន្តែ សួ វិចិត្រ គឺបេក្ខជនមួយរូបដែលមានប្រជាប្រិយភាពលេចធ្លោជាងគេ ចាប់តាំងពីដើមកម្មវិធីរហូតមកដល់វគ្គផ្តាច់ព្រ័ត្រនេះ។

អ្នកគាំទ្រ កំពុងរង់ចាំតាមដានយ៉ាងអន្ទះសារតើ សូ វិចិត្រ អាចស៊ូជាមួយបេក្ខជន ៣រូបទៀតនិងឈានទៅដើម្បីពាន Beat The Best សម្រាប់រដូវកាលទី១ នេះបានដែរឫយ៉ាងណា?

សូមជម្រាបថា ការប្រកួតផ្តាច់ព្រ័ត្រ Beat The Best នឹងត្រូវផ្សាយផ្ទាល់ទៅរាត្រីថ្ងៃអាទិត្យ ទី២៧ ខែកុម្ភៈ ឆ្នាំ២០២២ ដោយម្ចាស់ជ័យលាភី នឹងទទួលបានទឹកប្រាក់រង្វាន់ ១ម៉ឺន ៥ពាន់ដុល្លារ និងក្លាយជាតារាចម្រៀងកុងត្រាប្រចាំផលិតកម្មរស្មីហង្សមាស៕

អត្ថបទ និងរូបភាពដោយ៖ សារព័ត៌មានគីរីដងរែក