សេអ៊ូល៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍កាលពីថ្ងៃអាទិត្យថា មេដឹកនាំកូរ៉េខាងជើង លោក គីម ជុងអ៊ុន បានប្តេជ្ញាលើកកម្ពស់ទំនាក់ទំនងសហប្រតិបត្តិការជាមួយប្រទេសចិន នៅក្នុងលិខិតមួយផ្ញើជូនលោកប្រធានាធិបតី Xi Jinping ។
លិខិតនេះគឺដើម្បីឆ្លើយតបទៅនឹងការអបអរសាទរដែលលោក Xi បានផ្ញើសម្រាប់ខួបនៃការបង្កើតកូរ៉េខាងជើងនៅក្នុងខែនេះ ដែលប្រធានាធិបតីចិនបានបង្ហាញពីឆន្ទៈរបស់គាត់ក្នុងការពង្រឹងទំនាក់ទំនងជាយុទ្ធសាស្ត្រ និងកិច្ចសហប្រតិបត្តិការកម្រិតការងារ។
លោក Kim បាននិយាយនៅក្នុងសំបុត្រដែលបានផ្ញើកាលពីថ្ងៃព្រហស្បតិ៍ថា “ខ្ញុំជឿថា … ទំនាក់ទំនងមិត្តភាព និងកិច្ចសហប្រតិបត្តិការរវាងកូរ៉េខាងជើង និងចិននឹងអភិវឌ្ឍជាលំដាប់ ស្របតាមតម្រូវការនៃយុគសម័យថ្មី និងបំណងប្រាថ្នារបស់ប្រជាជនទាំងពីរនាពេលអនាគត” ។
ឈ្មោះផ្លូវការរបស់កូរ៉េខាងជើងគឺសាធារណរដ្ឋប្រជាមានិតប្រជាធិបតេយ្យកូរ៉េ។
ប្រភព Reuters ប្រែសម្រួលដោយគិរីដងរែក
