ខេត្តកំពង់ឆ្នាំង៖ លោកអភិបាលរងស្រុកកំពង់លែងម្នាក់ និងអ្នកពាក់ព័ន្ធពីរនាក់ទៀត ដែលជាអ្នកពាក់ព័ន្ធនឹងករណីទន្ទ្រានយកព្រៃលិចទឹកជុំវិញបឹងទន្លេសាបចំនួន ៩ហិកតានោះ ត្រូវបានអង្គភាពប្រឆាំងអំពើពុករលួយ (ACU) បញ្ជូនខ្លួនម្នាក់ទៅកាន់តុលាការខេត្ត នៅថ្ងៃទី៣ ខែមេសា ឆ្នាំ២០២៤នេះ ។
យោងតាមប្រភព លោក សយ ច័ន្ទវិចិត្ត អ្នកនាំពាក្យអង្គភាពប្រឆាំងអំពើពុករលួយ បានឲ្យដឹងថា បានចាប់បញ្ជូនជនសង្ស័យចំនួន ៣នាក់បានពាក់ព័ន្ធករណីទន្ទ្រានឈូសឆាយយកដីព្រៃលិចទឹក នៅខេត្តកំពង់ឆ្នាំង ហើយជនសង្ស័យទាំង៣នាក់នោះមានឈ្មោះថា ៖ ទី១.ឈ្មោះ ពុំ សុផល អភិបាលរងស្រុកកំពង់លែង, ទី២.ឈ្មោះ លឹម ដានីន ប្រធានការិយាល័យប្រជាពលរដ្ឋស្រុក និងទី៣.ឈ្មោះ ជួន តុំ មុខរបរម្ចាស់សិប្បកម្មផលិតទឹកកកត្រពាំងពេជ្រ។
លោកបានបន្តទៀតថា ជនសង្ស័យទាំង៣នាក់នេះ បានគប់គិតគ្នាជាប្រព័ន្ធ ដើម្បីទន្ទ្រាយយកដីព្រៃលិចទឹកទំហំ៩ហិចតា ជាជម្រកត្រីពង ស្ថិតក្នុងដែនព្រៃលិចទឹក (តំបន់២) ជុំវិញបឹងទន្លេសាប ដែលត្រូវការពារដោយច្បាប់ ដើម្បីឈួសឆាយមកធ្វើជាកម្មសិទ្ធិឲ្យទាន់ពេល ដែលរាជរដ្ឋាភិបាលមានគម្រោងធ្វើការវាស់វែងកាត់ឆ្វៀល សម្រាប់ជូនប្រជាពលរដ្ឋអាស្រ័យផលដោយស្របច្បាប់។
ប៉ុន្តែ ត្រូវបានជនសង្ស័យខាងលើបានប្រើប្រាស់ឧបាយកលមួយចំនួនដូចជា ការធ្វើលិខិតទិញលក់ ដែលធាតុពិតដីនេះមិនដែលមានការអាស្រ័យផលឡើយ ហើយគ្រាន់តែបានលិខិតទិញលក់ភ្លាម ពួកគេបានដាក់ត្រាក់ទ័រចំនួន៥គ្រឿង ចូលឈួសឆាយតែម្តង ដោយក្នុងគោលបំណងធ្វើការឈួសឆាយឲ្យបានរួចរាល់ក្នុងរយៈពេលតែមួយថ្ងៃ តែដោយមានឧបសគ្គដោយតំបន់នោះមានព្រៃលិចទឹកដែលមានទំហំធំៗ ដូចនេះការឈួសឆាយសម្រេចបានត្រឹមទំហំ៤ហិចតា នៃផ្ទៃដី៩ហិចតា។
ការឈួសឆាយក្នុងថ្ងៃទី២ ក៏ត្រូវបែកការណ៍ រហូតដល់មានមន្រ្តីជលផលស្រុកកំពង់លែង ដែលជាសេនាធិការរបស់ក្រសួងកសិកម្ម រុក្ខាប្រម៉ាញ់ និងនេសាទ ចុះទៅឃាត់ និងរាយការណ៍ដល់ថ្នាក់ខេត្ត ព្រមទាំងរៀបចំកសាងសំណុំរឿង ប៉ុន្តែដោយបទល្មើសនេះមានជាប់ពាក់ពន្ធ័និងបញ្ញត្តិមាត្រា៦០៨ នៃក្រមព្រហ្មទណ្ឌ និងមាត្រា៣២ នៃច្បាប់ស្តីពីការប្រឆាំងអំពើពុករលួយ អំពីបទល្មើសបំផ្លាញ និងគៃបំបាត់ រដ្ឋបាលជលផលស្រុកកំពង់លែងក៏បានផ្ទេរសំណុំរឿងនេះមក អង្គភាព។
អង្គភាពបានធ្វើការស៊ើបអង្គេតប្រមូលភស្តុតាង ស្តាប់ចម្លើយជនសង្ស័យ និងសាក្សី សរុប១៥នាក់ ហើយក៏ឈានទៅឃាត់ខ្លួនជនសង្ស័យទាំង៣ខាងលើ និងបានកសាងសំណុំរឿង នឹងបញ្ជូនជនសង្ស័យទៅសាលាដំបូងខេត្តកំពង់ឆ្នាំង ពាក់ពន្ធ័បទល្មើសចំនួន២ បញ្ញត្តិមាត្រា៦០៨ នៃក្រមព្រហ្មទណ្ឌ និងមាត្រា៣២ នៃច្បាប់ស្តីពីការប្រឆាំងអំពើពុករលួយ អំពីបទល្មើសបំផ្លាញ និងគៃបំបាត់ និងបញ្ញត្តិមាត្រា៩៨ ចំនុចទី១ នៃច្បាប់ស្តីពីជលផល។
អ្នកនាំពាក្យបានបញ្ជាក់បន្ថែមទៀតថា ឈ្មោះ ជួន តុំ និង ឈ្មោះ លឹម ដានីន ជាអ្នកប្រព្រឹត្តិផ្ទាល់ ដោយមានការសម្របសម្រួលឲ្យមានការឈួសឆាយកាប់ឆ្ការដីព្រៃលិចទឹកនេះ នៅចំនុចតាទុំ ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ដោយឈ្មោះ ពុំ សុផល មាត្រា២៩ និយមន័យនៃអ្នកសមគំនិត៕
បច្ចប្បន្នជនសង្ស័យទាំង៣នាក់ខាងលើនេះ ត្រូវាបានសមត្ថកិច្ចខេត្ត ចាប់បញ្ជូនទៅតុលាការ ដើម្បីក៏សាងសុំណុំរឿងដោះស្រាយទៅតាមនីតិវិធីច្បាប់។
ដោយគិរីដងរែក
