ម៉ូស្គូ៖ ក្រសួងការពារជាតិរុស្ស៊ីបានបញ្ជាក់ថា កងកម្លាំងរបស់ខ្លួនបានបំផ្លាញប្រព័ន្ធបាញ់គ្រាប់រ៉ុក្កែត HIMARS ផលិតដោយសហរដ្ឋអាមេរិកចំនួនពីរគ្រឿងនៅក្នុងតំបន់ Kharkiv ភាគឦសាននៃប្រទេសអ៊ុយក្រែន និងប្រព័ន្ធមីស៊ីលប្រឆាំងនាវា Harpoon នៅតំបន់ Odesa ភាគនិរតី។ នេះបើតាមរបាយការណ៍របស់ទីភ្នាក់ងារព័ត៌មាន Interfax របស់ប្រទេសរុស្ស៊ី។
ទោះបីជាយ៉ាងណា មិនមានការអត្ថាធិប្បាយភ្លាមៗពីខាងភាគីអ៊ុយក្រែន ជុំវិញការអះអាងចុងក្រោយរបស់ក្រសួងការពារជាតិរុស្ស៊ីនោះទេ ខណៈដែលសារព័ត៌មាន Al Jazeera ក៏មិនអាចផ្ទៀងផ្ទាត់ដោយឯករាជ្យនូវរបាយការណ៍របស់ក្រសួងបានដែរ។
អ៊ុយក្រែនបានសាទរ និងហៅប្រព័ន្ធបាញ់គ្រាប់រ៉ុក្កែត HIMARS ថា ជាឧបករណ៍ផ្លាស់ប្តូរហ្គេមដែលអាចធ្វើទៅបាន សម្រាប់ដំណើរនៃសង្រ្គាម។ សព្វាវុធទំនើបៗខាងលើនេះ នឹងអនុញ្ញាតឱ្យកងកម្លាំងអ៊ុយក្រែនអាចវាយប្រហារលើគោលដៅ និងឃ្លាំងអាវុធរបស់រុស្ស៊ីបន្ថែមទៀតនៅក្រោយតំបន់សមភូមិជួរមុខ៕
ប្រភព Interfax ប្រែសម្រួលដោយគីរីដងរែក
