សម្តេចហ៊ុន សែន ប្រធានព្រឹទ្ធសភាអំពាវនាវឲ្យពលរដ្ឋចូលរួមមូលនិធិកសាងហេដ្ឋារចនាសម្ព័ន្ធតាមព្រំដែន។ សម្តេចបានថ្លែងថា៖ ការគាំទ្រយ៉ាងផុសផុលពីសំណាក់ប្រជាពលរដ្ឋសម្រាប់មូលនិធិនេះ ជាការចូលរួមបង្ហាញពីស្មារតីសាមគ្គីការពារជាតិពិតប្រាកដពីសំណាក់គ្រប់មជ្ឈដ្ឋាននៃប្រជាជាតិកម្ពុជា។ សម្តេចបានបន្តថា៖ មូលនិធិនេះក៏អាចបញ្ជាក់បានថាតើអ្នកចោទប្រកាន់ថាកម្ពុជាកាត់៤ខេត្ត (រតនគិរី, ស្ទឹងត្រែង, មណ្ឌលគិរី, និងក្រចេះ) ឬច្រើនជាងនេះទៅឲ្យវៀតណាម ពួកគេចូលលុយដែរឬទេ។
សម្តេចបញ្ជាក់ថា៖ «ប្រសិនបើពួកគេខ្លាចបាត់ដីមែន វាជាពេលវេលាល្អសម្រាប់ការចូលរួមរបស់ពួកគេដើម្បីកសាងផ្លូវថ្នល់ ការកសាងសាលារៀន មន្ទីរពេទ្យ អណ្តូងទឹក។ល។នៅតាមភូមិថ្មីៗដែលរាជរដ្ឋាភិបាលនឹងចែកដីជូនប្រជាជនដែលគ្មានដីទៅរស់នៅនិងតាំងទីលំនៅទីនោះ»។ «ការរំពឹងទុកប្រជាជនដែលគ្មានដីនិងទទួលបានដីសម្រាប់បង្កបង្កើនផលដែលមានហេដ្ឋារចនាសម្ព័ន្ធទ្រទ្រង់ជាផ្លូវ ទឹក ភ្លើង សាលារៀន មន្ទីរពេទ្យ។ល។ ជាងនេះទៅទៀតខឿនការពារជាតិរបស់ប្រជាជនត្រូវបានពង្រឹងតាមរយៈប្រជាជនដែលនៅតាមព្រំដែនដែលជាព្រំដែនរស់ដែលរឹងមាំជាងរបងបេតុងឬដែកច្រើនជាន់និងល្អជាងការពង្រាយកងទ័ពនិងអាវុធដើម្បីការពារទៅទៀត»។
នៅពេលសួរថាតើអ្នកមិនគាំទ្រ CLV-DTA អាចនឹងចូលរួមបរិច្ចាគសម្រាប់មូលនិធិកសាងហេដ្ឋារចនាសម្ព័ន្ធតាមព្រំដែន ឬយ៉ាងណានោះ លោក យង់ ពៅ យល់ថា វាអាស្រ័យលើមនុស្សពីរប្រភេទ គឺអ្នកប្រឆាំង CLV-DTA ដោយមានរៀបវារៈនយោបាយ និងអ្នកដែលប្រឆាំងតាមគេតាមឯងដោយសារតែមិនទាន់បានទទួលព័ត៌មានច្បាស់លាស់អំពីកិច្ចសហប្រតិបត្តិការនេះ។
កាលពីថ្ងៃទី២២ ខែសីហា កន្លងទៅ លោកនាយករដ្ឋមន្ត្រី ហ៊ុន ម៉ាណែត បានថ្លែងថា ចាប់តាំងពីឆ្នាំ២០២៣ មក រាជរដ្ឋាភិបាលបានចែកដីសង្គមកិច្ចជូនយោធិន នគរបាលការពារព្រំដែន និងប្រជាពលរដ្ឋក្រីក្រប្រមាណ ១,៤លានហិតា ដែលមានមនុស្សសរុប ៤៩ម៉ឺនគ្រួសារ និងបានសង់ផ្ទះជូនពួកគាត់បានប្រមាណ ៨២០០ខ្នង។ ប៉ុន្តែ លោកមិនបានបញ្ជាក់ពីផែនការចែកដីនៅតាមព្រំដែន CLV នោះទេ។ យ៉ាងណាក៏ដោយ លោកធ្លាប់បានលើកឡើងថា ពលរដ្ឋគឺជាខឿនការពារជាតិដ៏រឹងមាំ៕
ដោយគិរីដងរែក
