បាងកក៖ ខុទ្ទកាល័យរបស់ប្រទេសថៃបានអនុម័តការនាំចូលពលករចំនួន 10,000 នាក់ពីប្រទេសស្រីលង្កា ដើម្បីដោះស្រាយបញ្ហាកង្វះកម្លាំងពលកម្មយ៉ាងធ្ងន់ធ្ងរបន្ទាប់ពីការចាកចេញរបស់ពលករកម្ពុជាចំពេលមានភាពតានតឹងនៅតាមព្រំដែននាពេលថ្មីៗនេះ។ការសម្រេចនេះធ្វើឡើងក្នុងកិច្ចប្រជុំគណៈរដ្ឋមន្ត្រីនៅថ្ងៃអង្គារនេះ ស្របពេលដែលពលករខ្មែរជាច្រើននាក់បានត្រឡប់ទៅប្រទេសកំណើតវិញ ដោយសារការប៉ះទង្គិចគ្នានៅតាមព្រំដែនកម្ពុជា-ថៃ ដែលធ្វើឱ្យក្រុមហ៊ុនថៃជួបបញ្ហាកង្វះកម្លាំងពលកម្ម….។
រដ្ឋមន្ត្រីក្រសួងការងារ លោក Phongkawin Jangrungreongkit បានប្រកាសថា ក្រសួងរបស់លោកបានចុះហត្ថលេខាលើអនុស្សរណៈនៃការយោគយល់គ្នាជាមួយប្រទេសស្រីលង្កា ដើម្បីនាំយកកម្មករនិយោជិតចំនួន 10,000 នាក់ដំបូង ជាមួយនឹងការពង្រីកសក្តានុពលដល់ 30,000នាក់ បន្ទាប់ពីរយៈពេលបណ្តុះបណ្តាលរយៈពេលមួយខែ….។ អគ្គនាយកក្រសួងការងារ លោក Somchai Morakotsriwan បានសង្កត់ធ្ងន់ថា ពលករថៃនឹងទទួលបានអាទិភាព បន្ទាប់មកការចុះឈ្មោះយ៉ាងតឹងរ៉ឹងចំពោះពលករចំណាកស្រុក ជាពិសេសពលរដ្ឋកម្ពុជា ដោយមានការសម្របសម្រួលជាមួយភ្នាក់ងារសន្តិសុខ។
លោក Somchai បាននិយាយថា “ប្រទេសថៃនៅតែត្រូវការពលករបរទេស ដើម្បីជំរុញសេដ្ឋកិច្ច ប៉ុន្តែត្រូវតែមានតុល្យភាពជាមួយនឹងកម្លាំងពលកម្មពីប្រទេសមួយចំនួន ដើម្បីជៀសវាងការពឹងផ្អែកខ្លាំងពេក”។ “វិស័យឯកជនត្រូវតែទទួលយកបច្ចេកវិទ្យា និងនវានុវត្តន៍ ដូច្នេះកង្វះកម្លាំងពលកម្មមិនរារាំងដល់ការអភិវឌ្ឍន៍សេដ្ឋកិច្ច។
ប្រភព Khaosode English
