ទីផ្សារសកលមានសុទិដ្ឋិនិយមចំពោះគោលនយោបាយទាំងនេះ។” “ប្រទេសចិនត្រូវបានរំពឹងថា នឹងសម្រេចបាននូវគោលដៅកំណើនខាងសេដ្ឋកិច្ចពេញមួយឆ្នាំចំនួន៥ភាគរយ”។ល។ នៅថ្ងៃទី៨ខែតុលា បន្ទាប់ពីរដ្ឋាភិបាលចិនបានឱ្យដឹងពីសភាពការណ៍ដែលអនុវត្តជាប្រព័ន្ធនូវគោលនយោបាយបន្ថែមមួយចំនួន ប្រព័ន្ធផ្សព្វផ្សាយបរទេសបានយកចិត្តទុកដាក់ព្រមៗគ្នាចំពោះការនេះ។ មតិអន្តរជាតិបានយល់ឃើញថា គោលនយោបាយទាំងនេះបានបង្កើនជំនឿចិត្តរបស់ភាគីនានាយ៉ាងខ្លាំង និងជំរុញសេដ្ឋកិច្ចចិនឱ្យទទួលការអភិវឌ្ឍប្រកបដោយភាពល្អប្រសើរ មួយរយៈពេលកន្លងមកនេះ ស្របពេលដែលប្រសិទ្ធិភាពនៃគោលនយោបាយដែលមានស្រាប់គ្រប់ផ្នែកបានបញ្ចេញ និងគោលនយោបាយបន្ថែមត្រូវបានដាក់ចេញនិងអនុវត្ត ដំណើរការនៃសេដ្ឋកិច្ចចិនមានស្ថិរភាពជាទូទៅ និងកើនឡើងជាលំដាប់ ហើយការប៉ានប្រមាណនៃទីផ្សារមានការកែលម្អយ៉ាងច្បាស់លាស់។
ក្នុងចំណោមនោះ ទិន្នន័យសេដ្ឋកិច្ចសំខាន់ៗដូចជាសន្ទស្សន៍អ្នកគ្រប់គ្រងការបញ្ជាទិញនៃមុខរបរផលិតកម្ម(PMI)ជាដើមបានងើបឡើងវិញយ៉ាងឆាប់រហ័ស ហើយទីផ្សារដូចជាភាគហ៊ុនជាដើមក៏បានងើបឡើងវិញផងដែរ។ ទន្ទឹមនឹងនេះ ទីផ្សារប្រើប្រាស់របស់ប្រទេសចិនក្នុងវិស្សមកាលថ្ងៃបុណ្យជាតិចិនមានភាពស្ទុះយ៉ាងខ្លាំង។ តាមទិន្នន័យបង្ហាញថា បរិមាណនៃការកក់សំបុត្រសម្រាប់តំបន់ទេសចរណ៍ទូទាំងប្រទេសចិនជាដើមបានកើនឡើងជាង៣៧ភាគរយ បើប្រៀបធៀបនឹងរយៈពេលដូចគ្នានៃឆ្នាំ២០២៣ ចំនួនភ្ញៀវទេសចរនិងចំណូលពីទេសចរណ៍នៅកន្លែងជាច្រើនសុទ្ធតែបានបំបែកកំណត់ត្រាថ្មីក្នុងប្រវត្តិសាស្ត្រ ហើយចំណូលបានមកពីការលក់សំបុត្រភាពយន្តទូទាំងប្រទេសចិនបានកើនឡើងលើសពី២១០០លានយាន់ប្រាក់ចិន។ល។ ប្រព័ន្ធផ្សព្វផ្សាយបរទេសបានវាយតម្លៃថា កំណើននៃការប្រើប្រាស់នៅទីផ្សារវប្បធម៌និងទេសចរណ៍ជាដើមបានបង្ហាញពីភាពរស់រវើកនៃសេដ្ឋកិច្ចចិន ការធ្វើដំណើរទៅក្រៅប្រទេសរបស់ភ្ញៀវទេសចរចិនក៏បានជំរុញការអភិវឌ្ឍសេដ្ឋកិច្ចក្នុងតំបន់ផងដែរ។
គួរបញ្ជាក់ផងដែរថា ទីផ្សារប្រើប្រាស់នៅថ្ងៃបុណ្យជាតិចិននៅឆ្នាំនេះបានលេចចេញនិន្នាការថ្មីជាច្រើន។ មួយផ្នែក ការប្រើប្រាស់បែបថ្មីដែលចាត់ទុកការធ្វើឌីជីថលូបនីយកម្ម ភាពបៃតងនិងការរួមបញ្ចូលគ្នាជាលក្ខណៈពិសេស បានបំពេញតម្រូវការលើពហុវិស័យរបស់អ្នកប្រើប្រាស់។ មួយផ្នែកទៀត ដោយទទួលនូវការជំរុញពីគោលនយោបាយមានអំណោយផលជាច្រើននៃទីផ្សារអចលនទ្រព្យដែលបានចេញផ្សាយមុនថ្ងៃឈប់សម្រាក ការប្រើប្រាស់និងការវិនិយោគខាងទំនិញខ្នាតធំ ដូចជាការទិញផ្ទះជាដើមបានរំលេចចេញនូវនិន្នាការងើបឡើងវិញ។
សញ្ញាវិជ្ជមានមួយហើយមួយទៀតដែលមកពីទីផ្សារចិនគឺជាលទ្ធផលនៃកិច្ចខិតខំប្រឹងប្រែងរួមគ្នារបស់ភាគីជាច្រើន។ នៅមុនថ្ងៃបុណ្យជាតិឆ្នាំនេះ រដ្ឋាភិបាលចិនបានដាក់ចេញនូវគោលនយោបាយមួយចំនួនដូចជា ការបញ្ចុះអត្រាប្រាក់បម្រុង ការកាត់បន្ថយអត្រាការប្រាក់ និងការកាត់បន្ថយអត្រាការប្រាក់កម្ចីទិញផ្ទះដែលមានស្រាប់ជាដើម បានបង្កើនជំនឿចិត្តនៃទីទីផ្សារនិងបញ្ចេញសក្តានុពលទីផ្សារយ៉ាងខ្លាំង។ មូលធនសកលបានទិញទ្រព្យសម្បត្តិចិនជាបន្តបន្ទាប់ ដែលបង្ហាញពីសុទិដ្ឋិនិយមចំពោះគោលនយោបាយសេដ្ឋកិច្ចនិងអនាគតអភិវឌ្ឍន៍សេដ្ឋកិច្ចរបស់ប្រទេសចិន។ ប្រការនេះក៏បានបញ្ជាក់ផងដែរថា និន្នាការទូទៅនៃសេដ្ឋកិច្ចចិនមិនបានកែប្រែទេ ហើយលក្ខខណ្ឌមានអំណោយផលដូចជាទីផ្សារដ៏ធំទូលាយ សេដ្ឋកិច្ចមានភាពធន់ខ្លាំងនិងសក្តានុពលដ៏ធំជាដើមមិនបានកែប្រែទេ។
ទន្ទឹមនឹងនោះ ទីផ្សារចិនដែលបានពង្រីកនិងបើកចំហជាបន្តបន្ទាប់បានបង្កើតឱកាសឈ្នះ-ឈ្នះសម្រាប់ប្រទេសនានា។ ថ្ងៃទី៨ខែតុលា រដ្ឋាភិបាលចិនបានប្រកាសថា នឹងបង្កើនកម្លាំងទាក់ទាញនិងលំនឹងការវិនិយោគ បង្កើនការបើកចំហដោយម្ចាស់ការថែមមួយកម្រិតទៀត ដាក់ចេញគម្រោងទុនបរទេសសំខាន់ៗមួយចំនួននិងអនុវត្តគោលនយោបាយលើកលែងទិដ្ឋាការសម្រាប់ឆ្លងកាត់ដែនចិនប្រកបដោយភាពកាន់តែបើកចំហ និងវិធានការថ្មីៗផ្សេងទៀត។ នេះគឺមានន័យថា ទ្វាររបស់ប្រទេសចិននឹងបើកចំហរឹតតែធំ ហើយកម្រិតនៃភាពងាយស្រួលក្នុងការចេញចូលដែននឹងត្រូវលើកកម្ពស់ជាបន្តបន្ទាប់ដើម្បីជួយសហគ្រាសទុនបរទេសចាក់គ្រឹះយ៉ាងរឹងមាំនៅប្រទេសចិននិងឈ្នះនៅប្រទេសចិន។
នាពេលបច្ចុប្បន្ននេះ បរិយាកាសខាងក្រៅដែលសេដ្ឋកិច្ចចិនកំពុងប្រឈមមុខនៅតែមានភាពស្មុគស្មាញនិងភាពតានតឹង ការរក្សាស្ថិរភាពនិងកំណើនជាលំដាប់នៃសេដ្ឋកិច្ចចិននៅតែត្រូវធ្វើកិច្ចខិតខំប្រឹងប្រែងជាច្រើនដដែល។ ប៉ុន្តែ ស្របពេលដែលសញ្ញាវិជ្ជមានមួយហើយមួយទៀតបានលេចចេញជាបន្តបន្ទាប់ ហើយស្របពេលដែលការប៉ាន់ប្រមាណនៃទីផ្សារបន្តមានភាពប្រសើរឡើង ប្រទេសចិនបានពោរពេញទៅដោយជំនឿចិត្តចំពោះការសម្រេចបាននូវគោលដៅនិងភារកិច្ចអភិវឌ្ឍន៍សេដ្ឋកិច្ចនិងសង្គមពេញមួយឆ្នាំ និងពោរពេញទៅដោយជំនឿចិត្តចំពោះការរក្សាបាននូវអភិវឌ្ឍន៍សេដ្ឋកិច្ចនិងសង្គមប្រកបដោយស្ថិរភាពនិងភាពល្អបរិសុទ្ធជាបន្តបន្ទាប់។”ជំនឿចិត្តរបស់ប្រទេសចិន”បែបនេះក៏ជាឱសថពង្រឹងកម្លាំងចិត្តសម្រាប់សេដ្ឋកិច្ចពិភពលោកផងដែរ៕
ដោយគិរីដងរែក
