គណបក្សនយោបាយសរុបចំនួន ១៨ បានចូលរួមប្រកួតប្រជែងក្នុងការបោះឆ្នោត ដែលធ្វើឡើងរៀងរាល់ ៥ ឆ្នាំម្តង ដើម្បីជ្រើសរើសសមាជិកសភាសម្រាប់១២៥ អាសនៈ។
យោងតាមលទ្ធផលបណ្តោះអាសន្នរបស់ គ.ជ.ប បានឲ្យដឹងថា គណបក្សប្រជាជនកម្ពុជាទទួលបានជ័យជម្នះលើសលប់នៅក្នុងការបោះឆ្នោតសកលកាលពីថ្ងៃទី២៣ខែកក្កដា។
គណៈកម្មាធិការជាតិរៀបចំការបោះឆ្នោតបាននិយាយនៅថ្ងៃអង្គារនេះថា លទ្ធផលផ្លូវការនៃការបោះឆ្នោតសកលរបស់កម្ពុជា ជាមួយនឹងការបែងចែកអាសនៈក្នុងរដ្ឋសភា នឹងត្រូវប្រកាសនៅថ្ងៃទី៤ ខែសីហា។
លទ្ធផលបណ្ដោះអាសន្នបានបង្ហាញថា គណបក្សប្រជាជនកម្ពុជាទទួលបាន ៦.៣៩៨.៣១១ សំឡេង ក្នុងចំណោមសន្លឹកឆ្នោតបានការសរុប ៧.៧៧៤.២៧៦ ហើយគណបក្សហ៊្វុនស៊ិនប៉ិច ទទួលបាន ៧១៦.៤៩០ សំឡេង។
ផ្អែកលើលទ្ធផលបណ្តោះអាសន្នរបស់ គ.ជ.ប គណបក្សប្រជាជនកម្ពុជាបាននិយាយថា ខ្លួនទទួលបានអាសនៈសភាចំនួន ១២០ ខណៈគណបក្សហ៊្វុនស៊ិនប៉ិចទទួលបាន ៥ អាសនៈ។
លោកនាយករដ្ឋមន្រ្តី ហ៊ុន សែន ដែលបានកាន់តំណែងជានាយករដ្ឋមន្ត្រីកម្ពុជាជាង៣៨ឆ្នាំ បានប្រកាសកាលពីសប្តាហ៍មុនថា លោកនឹងចុះចេញពីដំណែងនៅថ្ងៃទី២២ ខែសីហា ហើយនឹងផ្ទេរតំណែងបន្តទៅកូនប្រុសច្បង គឺលោក ហ៊ុន ម៉ាណែត។
លោកបានមានប្រសាសន៍ទៀតថា រដ្ឋសភានឹងបើកសម័យប្រជុំលើកដំបូងនៅថ្ងៃទី២១ ខែសីហា ហើយគណៈរដ្ឋមន្ត្រីថ្មីដែលដឹកនាំដោយលោក ហ៊ុន ម៉ាណែត នឹងស្បថចូលកាន់តំណែងនៅថ្ងៃទី ២២ ខែសីហា។
បច្ចុប្បន្ន លោក ហ៊ុន ម៉ាណែត អាយុ ៤៥ឆ្នាំ ជាសមាជិកគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា និងជាអគ្គមេបញ្ជាការរងនៃកងយោធពលខេមរភូមិន្ទ៕
![](https://kiridangrek.com/wp-content/uploads/2023/08/photo_2023-08-02_13-39-23-1024x682.jpg)
![](https://kiridangrek.com/wp-content/uploads/2023/08/photo_2023-08-02_13-39-30-1024x576.jpg)
![](https://kiridangrek.com/wp-content/uploads/2023/08/photo_2023-08-02_13-39-26-1024x576.jpg)
![](https://kiridangrek.com/wp-content/uploads/2023/08/photo_2023-08-02_13-37-27-1024x1024.jpg)
ដោយគិរីដងរែក