(ខេត្តកណ្តាល)តាមសេចក្តីរាយការណ៍បានឲ្យដឹងថាកម្លាំងនគរបាលក្រុងតាខ្មៅសហការជាមួយកម្លាំងនគរបាលខណ្ឌដូនពេញ នៅវេលាម៉ោង១១:៤០នាទីត្រូវនឹងថ្ងៃទី១៩ ខែឧសភា ឆ្នាំ២០២២ បានឃាត់ខ្លួនស្ត្រីម្នាក់ទិញលក់និងបញ្ចាំទូរស័ព្ទមួយកន្លែងស្ថិតនៅតាមផ្លូវលេខ៦៣កែងនឹងផ្លូវលេខ១៤៦ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីជនរងគ្រោះ ដោយមិនសុំបញ្ចេញឈ្មោះបានឲ្យដឹងថានៅវេលាម៉ោង១៤:០០នាទីរសៀលថ្ងៃទី១៨ ខែឧសភា ឆ្នាំ២០២២ ស្ថិតនៅផ្ទះជនរងគ្រោះនៅសង្កាត់ដើមមៀន ក្រុងតាខ្មៅ ខេត្តកណ្តាល ស្ត្រីរងគ្រោះខាងលើ បានទុកទូរស័ព្ទម៉ាកអាយហ្វូន១១ប្រូមេក ត្រូវជនសង្ស័យបានធ្វើសកម្មភាពលួចយកទូរស័ព្ទរបស់គាត់ ហើយជនរងគ្រោះ បានឆែកតាមកាមេរ៉ាសុវត្ថិភាពឃើញបុរសជាជនសង្ស័យវ័យ៨៤ឆ្នាំ បានចូលទៅលួចទូរស័ព្ទរបស់គាត់ ហើយជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ដើមមៀន នៃអធិការដ្ឋាននគរបាលក្រុងតាខ្មៅ។
ក្រោយសមត្ថកិច្ចទទួលពាក្យបណ្តឹងពីជនរងគ្រោះរួចរាល់ហើយ កម្លាំងជំនាញនៃស្នងការដ្ឋាននគរបាលក្រុងតាខ្មៅ បានឃាត់ខ្លួនបុរសជាជនសង្ស័យមកធ្វើការសាកសួរ។
តាមចម្លើយសារភាពរបស់បុរសជាជនសង្ស័យវ័យ៨៤ឆ្នាំរូបនេះ បានសារភាពថា រូបគាត់ពិតជាបានធ្វើសកម្មភាពមកលួចយកទូរស័ព្ទដៃមួយគ្រឿម៉ាកអាយហ្វូន១១ប្រូមេក ពីជនរងគ្រោះមកបញ្ចាំនៅម្តុំផ្សារទំនើបសូរិយាផ្លូវលេខ៦៣កែងនឹងផ្លូវ១៤៦។
បន្ទាប់ពីទទួលបានចម្លើយសារភាព របស់ជនសង្ស័យខាងលើ សមត្ថកិច្ចនគរបាលបានដឹកជនសង្ស័យ មកចង្អុលទីតាំងបញ្ចាំខាងលើ ដោយជនសង្ស័យបញ្ចាំចំនួនតែ ៥០០០០រៀលប៉ុណ្ណោះ ដោយម្ចាស់ទូរស័ព្ទគាត់ខ្ជិលវែងឆ្ងាយ សុខចិត្តចេញថ្លៃលស់យកទូរស័ព្ទ ពីកន្លែងបញ្ចាំវិញ ឲ្យតម្លៃ១០០ដុល្លារវិញ តែខាងស្ត្រីដែលជាម្ចាស់ទីតាំង មិនព្រមទទួលយក ទើបសមត្ថកិច្ចនគរបាលខណ្ឌដូនពេញ សហការជាមួយកម្លាំងជំនាញនគរបាលជំនាញខេត្តកណ្តាល នាំខ្លួនស្ត្រីម្ចាស់ទីតាំង ដែលទទួលផលចោរកម្មខាងលើ និងជនសង្ស័យ មកសាកសួរ និងចាត់ការតាមនីតិវិធី៕
ដោយគីរីដងរែក
