គណៈកម្មការវិន័យ និងគណៈកម្មការឧទ្ធរណ៍ សហព័ន្ធកីឡាបាល់ទាត់កម្ពុជា បានសម្រេចពិន័យសមាគមកីឡាបាល់ទាត់កងយោធពលខេមរភូមិន្ទ មិនឲ្យមានអ្នកគាំទ្រក្នុងការប្រកួត Cambodian Premier League តទល់វិសាខា លើដីខ្លួនឯង នៅថ្ងៃសៅរ៍ ទី០៩ ខែមេសា។ បើតាមការផុសលើទំព័រ Cambodian Premier League នៅព្រឹកថ្ងៃសុក្រ ទី០៨ ខែមេសា ការពិន័យនេះត្រូវបានធ្វើឡើងដោយសារតែអ្នកគាំទ្រក្រុមហៅកាត់ថា ទ័ព បានប្រើប្រាស់ពាក្យសម្ដីមិនសមរម្យដាក់មន្ត្រីការប្រកួត។ មិនតែប៉ុណ្ណោះ ដោយសារតែករណីនេះ ក្លិបក៏ត្រូវបានពិន័យជាប្រាក់១លានរៀលផងដែរ។
យ៉ាងណាភាគី CPL មិនបានបញ្ជាក់លម្អិតថា ករណីប្រើពាក្យពេចន៍មិនសមរម្យដាក់មន្ត្រីការប្រកួតនេះកើតឡើងក្នុងការប្រកួតណាទេ។ នេះជាករណីទី១ហើយ ចាប់តាំងពីក្រុមហ៊ុន Cambodian Premier League ចូលគ្រប់គ្រងក្របខណ្ឌកំពូលកម្ពុជា៕
ដោយ៖ គីរីដងរែក
