រថយន្តវីហ្គោមួយគ្រឿង ខណៈកំពុងបើកសុខៗស្រាប់តែរេចង្កូតជ្រុលទៅបុកតូបលក់ប្រេងសាំងនៅក្បែរផ្លូវ បណ្តាលឲ្យផ្ទុះឆេះយ៉ាងសន្ធោសន្ធៅបង្កការភ្ញាក់ផ្អើលពេញកន្លែងកើតហេតុ ។ ហេតុការណ៍នេះបានកើតមានឡើងនៅម៉ោងប្រមាណ ៧យប់កាលពីថ្ងៃទី ១ ខែឧសភា ឆ្នាំ ២០២២ ស្ថិតនៅចំណុចក្បែរឃ្លាំងប្រេងឥន្ធនៈ PTT លើផ្លូវជាតិលេខ ៤៥ ស្ថិតក្នុងភូមិអុងឃុំរាមស្រុកព្រៃនប់ ខេត្ត ព្រះសីហនុ។
ក្រោយកើតហេតុ គេឃើញរថយន្តពន្លត់អគ្គិភ័យរបស់អង្គភាពមូលដ្ឋានសមុទ្ររាម និងរថយន្តក្រុមហ៊ុនប្រេង PTT បានចេញ អន្តរាគមន៍បាញ់ទឹកពន្លត់ភ្លើងការពារកុំឲ្យ ឆេះរាល់ដាលដល់ផ្ទះអ្នកដទៃ នៅក្នុងករណីគ្រោះថ្នាក់ចរាចរណ៍ ដោយការធ្វេសប្រហែសនេះ មិនមានមនុស្សរងរបួសនោះទេ។ មន្ត្រីអាជ្ញាធរមូលដ្ឋានបាននិយាយថារថយន្ដបង្កម៉ាក TOYOTA VIGO ពណ៌ខ្មៅពាក់ស្លាកលេខ ភ្នំពេញ ២I-១២៣២ បើកបរទិសដៅពីឆ្នេរ ព្រែកចាកឆ្ពោះទៅរង្វង់មូលរូបនាគ (ចូលមូលដ្ឋានរាម) អ្នកបើកបរមិនទាន់ស្គាល់អត្តសញ្ញាណលុះមកដល់ចំណុចកើតហេតុរថយន្ដបានរេចង្កូត មកខាងស្ដាំហើយបុកតូបលក់សាំង១ កន្លែងបណ្ដាលឲ្យផ្ទុះឆេះតែម្ដង។
ក្រោយបង្កហេតុអ្នកបើកបរ និងអ្នករួមដំណើរ បានគេចចេញពីកន្លែងកើតហេតុបាត់ស្រមោល។ ចំណែករថយន្ដ សមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកព្រៃនប់ ជាបណ្ដោះអាសន្នដើម្បីស្រាវជ្រាវរកម្ចាស់មកដោះស្រាយតាមផ្លូវច្បាប់៕
ដោយគីរីដងរែក
