តើគ្រូជនជាតិហ្វីលីពីនប្រើហិង្សាដល់កូនសិស្សមានអាយុក្រោម៥ឆ្នាំក្នុងថ្នាក់ពេលរៀនមានទោសកំរិតណា ?

ម្ដាយណាមិនឈឺ! ស្ត្រីម្នាក់ទម្លាយរឿងកូនស្រីអាយុ ៥ ឆ្នាំ ត្រូវគ្រូជនជាតិហ្វីលីពីន ប្រើហិ-ង្សាពេលរៀនក្នុងថ្នាក់នាពេលថ្មីៗនេះ មហាជននៅក្នុងបណ្ដាញសង្គមបាននាំគ្នាផ្ទុះការភ្ញាក់ផ្អើល និង កើតក្ដីអាណិតអាសូរ ក្រោយស្រ្តីម្នាក់បានទម្លាយថាកូនស្រីរបស់ខ្លួនដែលមានអាយុទើប ០៥ ឆ្នាំ ត្រូវបានគ្រូជនជាតិហ្វីលីពីន ទះកំភ្លៀងពេលកំពុងរៀនក្នុងថ្នាក់។

តាមរយៈស្ត្រីជាម្ដាយ ដែលមានគណនីឈ្មោះ MiMi Jasmine បានរៀបរាប់ថា ៖ «ខ្ញុំឈឺចិត្តដេកយំមួយយប់ហើយ រឿងកូនរបស់ខ្ញុំត្រូវអ្នកគ្រូជនជាតិហ្វីលីពីនទះគាត់មួយកំផ្លៀង ពេលកំពុងរៀននៅក្នុងថ្នាក់។ ថាចង់លាក់រឿងហ្នឹងដល់ប៉ារបស់គាត់ តែខ្ញុំទទួលយោបល់ពីមិត្តៗ និងបងប្អូនខ្ញុំគាត់ថាកុំលាក់គាត់អីរឿងដល់ថ្នាក់នេះ។ មួយយប់ទល់ភ្លឺខ្ញុំដេកណែនទ្រូងយំមិនឈប់ គិតថាហេតុអីបានត្រូវវៃកូនខ្ញុំដល់ថ្នាក់នេះ»។

ស្ត្រីជាម្ដាយខាងលើ បានបន្តទៀតថា ជាទំលាប់ ពេលកូនខ្លួនមកពីសាលា គេតែងងូតទឹកសម្អាត ដុសសាប៊ូឱ្យកូន ស្រាប់តែកូនស្រែកឮៗថា «ម៉ាមី កុំប៉ះមុខកូន អូនឈឺខ្លាំង! តើកូនកើតអី? អ្នកគ្រូជនជាតិទះអូនមួយកំផ្លៀង អូនឈឺណាស់»។ ស្ត្រីជាម្ដាយ ក៏បានទាញថ្ពាល់មើល ឡើងហើមម្ខាង សាច់ថ្ពាល់រឹងដល់អញ្ចាញ តែមិនខៀវទេ។

ស្ត្រីជាម្ដាយ បានបញ្ជាក់ថា កូនរបស់ខ្លួនធ្លាប់ប្រាប់ថា «អូនខ្លាចអ្នកគ្រូជនជាតិគាត់កាច វ៉ៃអូនឈឺៗ ពេលខឹងអូន យកប៉ុងលុបក្តារខៀនគប់អូន ទាញសក់អូនឡើងលើ ឱ្យទៅឈរជើង ១ មុខក្តារខៀន ហើយស្រែកដាក់អូនខ្លាំងៗ» ទើបខ្លួនលួងកូនឱ្យឈប់មាត់ កុំឱ្យគ្រូធ្វើបាបខណៈមកដល់ផ្ទះថ្ងៃខ្លះ ក្មេងស្រីថា «អូនឈប់និយាយគ្នាហើយ ម៉ាមី អូនចេះណាស់លូវ អូនខ្លាចអ្នកគ្រូជនជាតិឡើងញ័រហើយ គាត់អត់វ៉ៃអូនទេ ថ្ងៃខ្លះទៀតអូនមាត់តិចៗ គាត់ទាញសក់អូនឡើងឈឺហើយវ៉ៃអូនខ្លាំងៗ»។

ទន្ទឹមទៅនឹងរឿងរ៉ាវបែបនេះ ស្ត្រីជាម្ដាយបានពោលពាក្យមិនអស់ចិត្តថា គាត់ជាគ្រូបែបម៉េច ខណៈម្តាយគ្រប់រូបឮថា គ្រូជនជាតិមកបង្រៀនគឺសប្បាយចិត្តកូន និង ឆាប់ចេះនិយាយភាសាបានល្អ តែនេះហួសពីការរំពឹងទុក ទៅជាវៃកូនខ្លួនកាច គប់ បោចសក់ឡើងលើ ឱ្យឈរជើង ១ ចុងក្រោយទះកំផ្លៀងឡើងហើមតែម្ដង។ ក្នុងនោះស្ត្រីរូបនេះបានពោលទៀតថា «ម៉ាក់អាណិតកូនខ្លាំងបំផុត កូនទើបអាយុ ៥ ឆ្នាំ យប់ឡើងនៅមឹមគោៗ ស្លៀកខោទឹកនោមនៅឡើយ តែត្រូវទទួលនៅការវាយទះតប់ហើមមុខបែបនេះ ម៉ាក់ទទួលយកមិនបានទេ»៕

ដោយគីរីដងរែក