ក្រសួងធនធានទឹក និងឧតុនិយមរបស់កម្ពុជា (MWRM) បានព្យាករណ៍ថា នឹងមានភ្លៀងធ្លាក់ពីតិចទៅច្រើននៅទូទាំងប្រទេសនៅសប្តាហ៍ក្រោយ ដែលអាចបណ្តាលឱ្យមានទឹកជំនន់ភ្លាមៗនៅក្នុងខេត្តចំនួន៨។
ក្រសួងធនធានទឹក និងឧតុនិយមបាននិយាយនៅក្នុងសេចក្តីថ្លែងការណ៍ព្យាករណ៍មួយថា ចាប់ពីថ្ងៃទី ១៥ ខែសីហាដល់ថ្ងៃទី ១៩ ខែសីហា កម្ពុជានឹងទទួលរងសម្ពាធទាបចេញពីប្រទេសឥណ្ឌា ក៏ដូចជាខ្យល់មូសុងនិរតីកម្រិតមធ្យម។
ក្រសួងបានបន្តទៀតថា “ខេត្តមួយចំនួនដែលមានទឹកភ្លៀងពីមធ្យមទៅច្រើននាពេលកន្លងមក នឹងទទួលរងហានិភ័យនៃជំនន់ទឹកភ្លៀង”។
ខេត្តដែលប្រឈម នឹងគ្រោះទឹកជំនន់មានខេត្ត កំពង់ធំ ព្រះវិហារ រតនគិរី ស្ទឹងត្រែង ក្រចេះ ត្បូងឃ្មុំ កំពង់ចាម និង ឧត្តរមានជ័យ។
ក្រសួងក៏បានណែនាំសាធារណជនឱ្យមានការប្រុងប្រយ័ត្នបន្ថែមក្នុងអំឡុងពេលដែលបានរៀបរាប់ខាងលើដើម្បីជៀសវាងគ្រោះថ្នាក់ដែលអាចកើតមាននិងការខូចខាតទ្រព្យសម្បត្តិ។
នៅកម្ពុជា ជាធម្មតាទឹកជំនន់បានកើតឡើងនៅចន្លោះខែសីហាដល់ខែតុលា។ កាលពីឆ្នាំមុន ទឹកជំនន់បានឆក់យកជីវិតមនុស្ស ១១ នាក់ និងបង្ខំឱ្យមានការជម្លៀសប្រជាពលរដ្ឋចំនួន ១៧២,២៩៧ នាក់ផ្សេងទៀត នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ។
នៅឆ្នាំ ២០២០ បន្ទាប់ពីព្យុះទីហ្វុង MOLAVE បានមកដល់នៅថ្ងៃទី២៩ ខែតុលា ទីក្រុង និងស្រុកចំនួន១២១ ក្នុងខេត្តចំនួន២០ ក្នុងចំណោម ២៥ ខេត្តត្រូវបានរងផលប៉ះពាល់។ យ៉ាងហោចណាស់មនុស្ស ៤៤នាក់បានស្លាប់ និង ១៧៥,៨៧២ គ្រួសារបានរងផលប៉ះពាល់។
