(សេអ៊ូល)៖ កូរ៉េខាងជើង បានហៅប្រធានាធិបតីអាមេរិក លោក ចូ បៃដិន ថាជា «មនុស្សចាស់វង្វេង» បន្ទាប់ពីរូបលោកបានចោទប្រកាន់ថា ប្រធានាធិបតីរុស្ស៉ី លោក វ្ល៉ាឌីមៀ ពូទីន បានប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអាទិត្យ ទី១០ ខែមេសា ឆ្នាំ២០២២។
ប្រតិកម្មរបស់កូរ៉េខាងជើង ធ្វើឡើងជាការឆ្លើយតបទៅនឹងលោក បៃដិន ដែលបានហៅលោក ពូទីនថាជាឧក្រិដ្ឋជនសង្រ្គាម និងបានអំពាវនាវឱ្យ មានសវនាការកាត់ទោសប្រធានាធិបតីរុស្ស៉ីរូបនេះ ពីបទប្រព្រឹត្តអំពើឃោរឃៅប្រឆាំងនឹងជនស៊ីវិល ក្នុងទីក្រុងប៊ូចា នៅក្នុងប្រទេសអ៊ុយក្រែន។
នៅក្នុងបទអត្ថាធិប្បាយមួយចេញផ្សាយកាលពីថ្ងៃសៅរ៍ចុងសប្ដាហ៍នេះ, ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានគូសបញ្ជាក់ដូច្នេះថា «អ្នកដែលនិយាយមិនចេះគិតគឺមានតែកូនចៅជំនាន់ក្រោយរបស់អាមេរិកតែប៉ុណ្ណោះ ដែលជាគ្រូបាអាចារ្យខាងឈ្លានពាន…សរុបមកវិញគាត់ (លោក បៃដិន) អាចមានបញ្ហាសតិបញ្ញា ហើយការនិយាយមិនចេះគិតរបស់លោក គឺគ្រាន់តែបង្ហាញពីភាពធ្វេសប្រហែសរបស់មនុស្សចាស់ វង្វេងម្នាក់»។
គួរបញ្ជាក់ថា កូរ៉េខាងជើង ក៏ធ្លាប់បានប្រកាសផងដែរថាខ្លួនឈរនៅជាមួយរុស្ស៉ី ជុំវិញសង្រ្គាមនៅអ៊ុយក្រែន ដោយចោទថាសហរដ្ឋអាមេរិក ទៅវិញទេដែលជាដើមហេតុនាំឱ្យសង្រ្គាមផ្ទុះឡើង៕
ប្រភព AFP ដោយ៖ គីរីដងរែក
