(ដូហា)៖ ព្រឹត្តិការណ៍បាល់ទាត់ពិភពលោកដ៏រំជើបរំជួល FIFA World Cup 2022 នឹងចាប់ផ្តើមប្រកួតផ្លូវការនៅក្នុងរយៈពេលតែ ៤ថ្ងៃទៀតប៉ុណ្ណោះ ពោលគឺនៅរាត្រីថ្ងៃទី២០ ខែវិច្ឆិកាខាងមុខ នៅប្រទេសកាតាតែមួយគត់។
កាតា នឹងបើកឆាកប្រកួតមុនគេទល់នឹងក្រុមមកពីតំបន់អាមេរិកឡាទីន អេក្វាទ័រ នាម៉ោង ១១៖០០យប់ ថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២២ (ម៉ោងនៅកម្ពុជា)។
ទាំង ៣២ប្រទេសដែលត្រៀមចូលរួមយុទ្ធនាការ ៤ឆ្នាំម្តងនេះ សុទ្ធតែបានបញ្ចេញឈ្មោះកីឡាករសរុបទាំង ២៦នាក់រួចរាល់ ជាមួយក្រុមដែលធ្លាប់ឈ្នះពានធំលំដាប់ពិភពលោកផងដែរ ដោយអវត្តមានតែជើងខ្លាំងនៅអឺរ៉ុប អាសូរីអ៉ីតាលីមួយគត់ ដែលធ្លាប់ឈ្នះពាន World Cup បាន ៤ដងច្រើនជាងគេនៅអឺរ៉ុបស្មើជាមួយឥន្រ្ទីដែកអាល្លឺម៉ង់នោះ។
បណ្តាក្រុមមកពី ៥តំបន់ និងចែកចេញជា ៦សហព័ន្ធធំៗនោះ គឺត្រូវបានចែកចេញជា ៨ពូល (A-H) ដោយក្នុង ១ពូលមាន ៤ក្រុម និងក្រុមលេខ១ និងលេខ២ ក្រោយបញ្ចប់ប្រកួតសន្សំពិន្ទុ ៣ប្រកួតនឹងត្រូវឡើងទៅប្រកួតវគ្គខ្វែង ១៦ក្រុម គ្រាដែលក្រុមលេខ៣ និងលេខ៤ ត្រូវត្រឡប់ទៅផ្ទះវិញ ជាមួយនឹងកញ្ចប់ថវិកាដែលត្រូវបានកំណត់ដោយសហព័ន្ធអន្តរជាតិ FIFA ផងដែរ។
មាន់គកបារាំង ជាក្រុមជើងឯកចុងក្រោយគេជំនាន់ទី២១ នៃ FIFA World Cup 2018 នៅប្រទេសរុស្ស៊ី ដែលបានយកឈ្នះក្រុមនៅអឺរ៉ុបដូចគ្នា ក្រូអាតក្នុងលទ្ធផល ៤ទល់នឹង២ នៅវគ្គផ្តាច់ព្រ័ត្រ ដែលសុទ្ធសឹងតែបានឡើងមកវគ្គចែកពូលនាពេលខាងមុខទៀត៕
ប្រែសម្រួលដោយគីរីដងរែក
