លោក Wang Yi តំណាងពិសេសរបស់លោក Xi Jinpingប្រធានរដ្ឋចិន និងជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិននិងជារដ្ឋមន្ត្រីការបរទេសចិនបានអញ្ជើញចូលរួមកិច្ចប្រជុំកំពូលលើកទី៧នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA)នៅទីក្រុងបាគូ ប្រទេសអាស៊ែបៃហ្សង់កាលពីថ្ងៃទី១៥ ខែតុលា និងថ្លែងសុន្ទរកថាគន្លឹះ។ លោក Wang Yi បានថ្លែងថា សន្និសីទCICA គឺជាវេទិកាស្តីពីការសន្ទនា និងកិច្ចសហប្រតិបត្តិការនៃទ្វីបអាស៊ីទាំងមូល ដែលផ្តួចផ្តើម និងរួមគ្នាបង្កើតឡើងដោយបណ្តាប្រទេសអាស៊ី។ ប្រទេសចិនសូមកោតសរសើរខ្ពស់ចំពោះកិច្ចខិតខំប្រឹងប្រែងរបស់ប្រទេសអាស៊ែបៃហ្សង់ ក្នុងអំឡុងពេលធ្វើជាប្រធានផ្លាស់វេននៃសន្និសីទ ដែលបានជំរុញកិច្ចសហប្រតិបត្តិការ CICA និងការកសាង “អាស៊ីកាន់តែរឹងមាំ” ប្រទេសចិនមានឆន្ទៈបន្តផ្តល់ការគាំទ្រដ៏ខ្លាំងក្លា និងចូលរួមយ៉ាងសកម្មនៅក្នុងដំណើរការនៃ CICA។
លោក Wang Yi បានលើកឡើងគំនិតផ្តួចផ្តើម៤ចំណុច៖ ទីមួយ រួមគ្នារក្សាសន្តិភាព និងស្ថិរភាព។ ទីពីរ រួមគ្នាជំរុញវិបុលភាព និងការស្តារឡើងវិញ ។ ទីបី រួមគ្នាជំរុញការរៀនសូត្រពីអរិយធម៌ទៅវិញទៅមក។ ទីបួន រួមគ្នាជំរុញអភិបាលកិច្ចសកលមានសុក្រឹតភាព។ លោក Wang Yi បានបន្តថា ប្រទេសចិនមានឆន្ទៈធ្វើការជាមួយគ្រប់ភាគីទាំងអស់ ដើម្បីកសាងសហគមន៍ជោគវាសនារួមសម្រាប់អាស៊ីដែលប្រកបដោយសន្តិភាព ស្ថិរភាព វិបុលភាព បើកចំហ និងបរិយាបន្ន ដើម្បីរួមចំណែកជាកម្លាំងអាស៊ីកាន់តែខ្លាំងក្លាចំពោះសន្តិភាពនិងការអភិវឌ្ឍរបស់ពិភពលោក។
កិច្ចប្រជុំនេះបានអនុម័តនិងចេញផ្សាយ “សេចក្តីប្រកាសនៃកិច្ចប្រជុំកំពូលលើកទី៧នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA)”៕
ដោយគិរីដងរែក
