កាសែត New York Times បានរាយការណ៍កាលពីថ្ងៃព្រហស្បតិ៍ ដោយដកស្រង់ឯកសារ អ៊ីមែល និងបទសម្ភាសន៍ មន្ត្រីអ៊ីស្រាអែលទទួលបានឯកសារដែលពិពណ៌នាអំពីផែនការប្រយុទ្ធរបស់ក្រុមហាម៉ាសសម្រាប់ការវាយប្រហារភេរវកម្មថ្ងៃទី 7 ខែតុលា របស់ខ្លួនជាងមួយឆ្នាំមុនពេលក្រុមសកម្មប្រយុទ្ធបានធ្វើការវាយលុក។
ឯកសារប្រហែល 40 ទំព័រមិនបានផ្តល់កាលបរិច្ឆេទសម្រាប់ការវាយប្រហារនោះទេ ប៉ុន្តែបានគូសបញ្ជាក់ពី “ចំណុចមួយ” ប្រភេទនៃការលុកលុយយ៉ាងសាហាវដែលក្រុមហាម៉ាស់បានធ្វើនៅក្នុងទឹកដីអ៊ីស្រាអែលក្នុងខែតុលា នេះបើយោងតាមកាសែត Times ដែលបានពិនិត្យមើលឯកសារដែលបានបកប្រែ។ មន្ត្រីយោធា និងចារកម្មអ៊ីស្រាអែលបានច្រានចោលផែនការនេះ ដោយវាយតម្លៃថា វានឹងពិបាកពេកសម្រាប់ក្រុមហាម៉ាស់ក្នុងការអនុវត្ត នេះបើយោងតាមកាសែត Times ។
ឯកសារដែលអាជ្ញាធរអ៊ីស្រាអែលដាក់រហស្សនាមថា “Jericho Wall” បានរៀបរាប់លម្អិតអំពីការវាយប្រហារ ដែលនឹងគ្របដណ្ដប់លើ កំពែងជុំវិញតំបន់ Gaza Strip ដណ្ដើមយកទីក្រុងរបស់អ៊ីស្រាអែល និងកំណត់គោលដៅមូលដ្ឋានយោធាសំខាន់ៗ។ កាសែត The Times បាននិយាយថា វាត្រូវបានតាមដានដោយភាពជាក់លាក់ដោយក្រុមហាម៉ាស់ នៅថ្ងៃទី 7 ខែតុលា។
នៅថ្ងៃនោះ ក្រុមសកម្មប្រយុទ្ធហាម៉ាស់ បានវាយប្រហារឆ្លងព្រំដែនពីតំបន់ហ្គាហ្សា ក្នុងការវាយប្រហារសម្របសម្រួលមួយ ដោយបានចាប់ចំណាប់ខ្មាំងជាង 200 នាក់ និងបានសម្លាប់មនុស្សប្រហែល 1,200 នាក់ ដែលជាការវាយប្រហារដ៏ធំបំផុតលើប្រទេសអ៊ីស្រាអែល ចាប់តាំងពីការបង្កើតឡើងរបស់ប្រទេសក្នុងឆ្នាំ 1948 ។ការវាយប្រហារនេះត្រូវបានគេមើលឃើញយ៉ាងទូលំទូលាយថាជាការបរាជ័យផ្នែកស៊ើបការណ៍សម្ងាត់របស់អ៊ីស្រាអែល ដោយមានមន្ត្រីការពារជាតិ និងសន្តិសុខកំពូលមួយចំនួនបានចេញមុខក្នុងខែតុលា ដើម្បីទទួលខុសត្រូវក្នុងកម្រិតមួយចំនួនចំពោះកំហុសឆ្គងដែលនាំឱ្យមានការវាយប្រហារ។
នៅចុងខែនោះ នាយករដ្ឋមន្ត្រីអ៊ីស្រាអែល លោក Benjamin Netanyahu បានទទួលការរិះគន់ជាសាធារណៈយ៉ាងខ្លាំង បន្ទាប់ពីលោកបានចោទប្រកាន់ប្រធានសន្តិសុខនៅក្នុងការបង្ហោះតាមប្រព័ន្ធផ្សព្វផ្សាយសង្គមដែលត្រូវបានលុបនៅពេលក្រោយ ថាមិនបានព្រមានគាត់អំពីការវាយប្រហារដែលនឹងកើតឡើង។ លោក Netanyahu បានសរសេរនៅពេលនោះថា “ផ្ទុយទៅវិញ មន្ត្រីការពារជាតិទាំងអស់… បានវាយតម្លៃថា ក្រុមហាម៉ាសត្រូវបានរារាំង”។
យោងតាមកាសែត Times ឯកសារ “Jericho Wall” ត្រូវបានផ្សព្វផ្សាយយ៉ាងទូលំទូលាយក្នុងចំណោមមេដឹកនាំយោធា និងចារកម្មរបស់អ៊ីស្រាអែល ប៉ុន្តែវាមិនច្បាស់ថាតើលោក Netanyahu ឬមេដឹកនាំនយោបាយកំពូលផ្សេងទៀតបានឃើញឯកសារនោះទេ។
ប្រភព CNN ប្រែសម្រួលដោយគិរីដងរែក
