បាងកក៖ នាយករដ្ឋមន្ត្រីថៃ Paetongtarn Shinawatra ត្រូវបានដកចេញពីតំណែង បន្ទាប់ពីតុលាការធម្មនុញ្ញបានកាត់ក្តីថា លោកស្រីបានបំពានក្រមសីលធម៌ ទាក់ទងនឹងការបែកធ្លាយខ្សែអាត់សំឡេងនៃការសន្ទនារបស់លោកស្រីជាមួយមេដឹកនាំកម្ពុជា លោក ហ៊ុន សែន អំពីជម្លោះព្រំដែន។ តុលាការធម្មនុញ្ញសម្រេច 6:3 ថាលោកស្រីមានពិរុទ្ធចំពោះការចោទប្រកាន់នេះ ខណៈដែលការចរចារបស់នាងជាមួយលោក ហ៊ុន សែន ដូចមានភស្តុតាងក្នុងវីដេអូឃ្លីបនោះ គឺជាការបរាជ័យក្នុងការការពារផលប្រយោជន៍ជាតិដោយផ្តល់អាទិភាពដល់ផលប្រយោជន៍របស់កម្ពុជាជាងប្រទេសជាតិ។ ការប្រព្រឹត្តនេះជាការបំពានយ៉ាងធ្ងន់ធ្ងរលើស្តង់ដារសីលធម៌។
តុលាការបានបង្គាប់ឱ្យបញ្ចប់ឋានៈជារដ្ឋមន្ត្រីរបស់លោកស្រីដែលមានប្រសិទ្ធភាពនៅថ្ងៃទី១ ខែកក្កដា ដែលជាលទ្ធផលត្រូវរំលាយគណៈរដ្ឋមន្ត្រីទាំងមូល។ គណបក្សភឿថៃ បានបញ្ជាក់ថា ពួកគេត្រៀមតែងតាំងបេក្ខភាពនាយករដ្ឋមន្ត្រីទី៣ របស់ខ្លួន គឺលោក Chaikasem Nitisiri អាយុ ៧៦ឆ្នាំ ជានាយករដ្ឋមន្ត្រីថ្មី ដោយបញ្ជាក់ថា រដ្ឋាភិបាលចម្រុះនៅតែរឹងមាំ។ អតីតយុទ្ធជននយោបាយដែលធ្លាប់បម្រើការជារដ្ឋមន្ត្រីក្រសួងយុត្តិធម៌ និងអគ្គមេធាវី បានបង្ហាញទំនុកចិត្តលើសមត្ថភាពដឹកនាំ ដោយសង្កត់ធ្ងន់ថា តួនាទីនាយករដ្ឋមន្ត្រី “មិនតម្រូវឱ្យមានគុណភាពអស្ចារ្យទេ” ហើយអភិបាលកិច្ចនោះ “ដើរតាមធម្មជាតិរបស់វា” ។
Paetongtarn កូនស្រីពៅរបស់មហាសេដ្ឋីអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា ត្រូវបានចោទប្រកាន់ថា ខកខានក្នុងតួនាទីរបស់ខ្លួន ដោយការមិនក្រោកឈរឡើង ដើម្បីប្រទេសជាតិឲ្យបានត្រឹមត្រូវ ក្នុងជំនួបពិភាក្សាកាលពីថ្ងៃទី១៥ ខែមិថុនា ជាមួយប្រធានព្រឹទ្ធសភាកម្ពុជា សម្តេចតេជោ ហ៊ុន សែន ដើម្បីពិភាក្សាពីភាពតានតឹងលើទឹកដីដែលប្រជាជាតិទាំងពីរទាមទារ។ឃ្លីបនេះត្រូវបានចេញផ្សាយជាសាធារណៈនៅថ្ងៃទី ១៨ ខែមិថុនា ហើយមួយថ្ងៃក្រោយមក សមាជិកព្រឹទ្ធសភាចំនួន ៣៦ រូបមកពីក្រុម Blue Group ឬក្រុមដែលមានទំនាក់ទំនងជិតស្និទ្ធជាមួយគណបក្ស Bhumjaithai បានប្រកាសហត្ថលេខារបស់ពួកគេលើញត្តិដើម្បីដកលោក Paetongtarn ចេញពីតំណែងនាយករដ្ឋមន្ត្រី។
អ្នករិះគន់គណបក្សប្រឆាំងចោទប្រកាន់ថានាងមានការផ្សះផ្សាហួសហេតុចំពោះ សម្តេចតេជោ ហ៊ុន សែន អតីតមេដឹកនាំខ្លាំងរបស់កម្ពុជា ដោយសំអាងថានាងធ្វើឱ្យខូចសេចក្តីថ្លៃថ្នូររបស់ប្រទេសថៃ ដោយហៅគាត់ថាជាពូ និងចេញមុខរិះគន់មេទ័ពថៃដែលទទួលខុសត្រូវសន្តិសុខព្រំដែន។ ខណៈពេលដែល Paetongtarn ចេញការសុំទោស នាងបានរក្សាថា វិធីសាស្រ្តរបស់នាងមិនបង្កគ្រោះថ្នាក់ដល់ប្រទេសឡើយ ហើយបានការពារការលើកឡើងរបស់នាងជាផ្នែកនៃយុទ្ធសាស្ត្រការទូត។
ទោះជាយ៉ាងណាក៏ដោយ នៅថ្ងៃទី 20 ខែមិថុនា ប្រធានព្រឹទ្ធសភាបានចុះហត្ថលេខាលើញត្តិពីសមាជិកព្រឹទ្ធសភាទាំង 36 រូប ហើយដាក់ទៅតុលាការធម្មនុញ្ញ ដោយចោទប្រកាន់លោកស្រី Paetongtarn ថាបានបំពានយ៉ាងធ្ងន់ធ្ងរលើបទដ្ឋានសីលធម៌ និងស្នើសុំសេចក្តីសម្រេចថាតើការកាន់តំណែងជានាយករដ្ឋមន្ត្រីគួរតែបញ្ចប់ឬយ៉ាងណា។ តុលាការបានទទួលយកញត្តិនេះ ហើយបានបោះឆ្នោតជាឯកច្ឆ័ន្ទដើម្បីពិនិត្យញត្តិដែលចោទប្រកាន់លោកស្រី Paetongtarn ពីបទបំពានក្រមសីលធម៌ និងបានបោះឆ្នោត 7-2 ព្យួរលោកស្រីជាបន្ទាន់នៅថ្ងៃទី 1 ខែកក្កដា រហូតដល់វាចេញសេចក្តីសម្រេច។
ខណៈពេលដែលនាងត្រូវបានព្យួរពីតួនាទីរបស់នាង ភាពតានតឹងនៅតាមព្រំដែនបានកើនឡើងដែលនាំឱ្យមានការប្រយុទ្ធគ្នានៅព្រំដែនដ៏សាហាវរយៈពេលប្រាំថ្ងៃចាប់ពីថ្ងៃទី 24 ខែកក្កដាដល់ថ្ងៃទី 28 ខែកក្កដា ដែលបានឆក់យកជីវិតមនុស្សរាប់សិបនាក់ និងបានបង្ខំមនុស្សជាង 260,000 នាក់ឱ្យភៀសខ្លួនចេញពីផ្ទះរបស់ពួកគេ។ នាយករដ្ឋមន្ត្រីស្តីទី Phumtham Wechayachai បានចូលខ្លួនមកដោះស្រាយវិបត្តិនេះ។ នៅថ្ងៃទី២៨ កក្កដា លោកបានធ្វើដំណើរទៅចរចាបទឈប់បាញ់ជាមួយនាយករដ្ឋមន្ត្រីកម្ពុជា ហ៊ុន ម៉ាណែត តាមការអញ្ជើញរបស់ប្រធានអាស៊ានម៉ាឡេស៊ី លោក អាន់វ៉ា អ៊ីប្រាហ៊ីម។ គាត់ក៏បានទទួលការអំពាវនាវអរគុណពីប្រធានាធិបតីអាមេរិក Donald Trump ដែលបានដើរតួនាទីយ៉ាងសំខាន់ក្នុងការជំរុញឱ្យមានកិច្ចចរចា។
នៅក្នុងសវនាការនៅថ្ងៃទី 25 ខែសីហា Paetongtarn បានបញ្ជាក់ថា ការទំនាក់ទំនងរបស់នាងជាមួយមេដឹកនាំកម្ពុជាធ្វើឡើងក្នុងចេតនាល្អ ក្នុងគោលបំណងបញ្ចៀសជម្លោះប្រដាប់អាវុធរវាងប្រទេសទាំងពីរ ទោះជាយ៉ាងណាក៏ដោយ សាលក្រមថ្ងៃទី 29 ខែសីហារបស់តុលាការមានន័យថា Paetongtarn នាយករដ្ឋមន្ត្រីទី 31 របស់ប្រទេសថៃបានជួបជោគវាសនាដូចគ្នានឹងនាយករដ្ឋមន្ត្រីបួននាក់ផ្សេងទៀតមកពីគណបក្សភឿថៃ (ទោះបីជាមិនស្ថិតក្រោមឈ្មោះដូចគ្នាក៏ដោយ) រួមទាំងម្តាយមីងរបស់ Paetongtarn គឺលោកស្រី Yingluck Shinawatra និងកាលពីឆ្នាំមុន Srettha Thavisin។
ប្រភព Khaosodenglish ប្រែសម្រួលដោយគិរីដងរែក
