ចិន បញ្ជូនយន្តហោះយោធា ៦២ គ្រឿង និងនាវាចម្បាំង ៧ គ្រឿង ទៅច្រកសមុទ្រ តៃវ៉ាន់

កងកម្លាំងប្រដាប់អាវុធតៃវ៉ាន់ បានមើលឃើញយន្តហោះចំនួន៦២គ្រឿង និងនាវាចំនួន៧គ្រឿងរបស់កងទ័ពរំដោះប្រជាជនចិន (PLA) ចូលទៅជិតដែនកោះ ដែលគ្រប់គ្រងដោយខ្លួនឯងមួយនេះ កាលពីថ្ងៃពុធទី៣១ខែសីហា។

ក្រសួងការពារជាតិតៃវ៉ាន់ បាននិយាយនៅលើ Twitter ថា “នាវា ៧គ្រឿង និងយន្តហោះ ៦២គ្រឿងរបស់ PLA នៅជិតតំបន់ជុំវិញរបស់យើង ត្រូវបានប្រទះឃើញនៅថ្ងៃទី៣១ខែសីហាឆ្នាំ ២០២២ រហូតដល់ម៉ោង ៩យប់”។

យោងតាមក្រសួង ក្នុងចំណោមនោះ មានយន្តហោះចំនួន១៥គ្រឿង បានហោះឆ្លងកាត់អ្វីដែលគេហៅថា “ខ្សែបន្ទាត់កណ្តាល” នៃច្រកសមុទ្រតៃវ៉ាន់ ដែលតំណាងជាព្រំដែនសមុទ្រមិនផ្លូវការរវាងកោះនេះ និងចិនដីគោក។

យន្តហោះទាំងនោះរួមមានយន្តហោះចម្បាំង J-16 ចំនួនប្រាំបួនគ្រឿង, យន្តហោះចម្បាំងអេឡិចត្រូនិក Y-8 មួយគ្រឿង, យន្តហោះប្រឆាំងនាវាមុជទឹក Y-8 មួយគ្រឿង និងយន្តហោះទម្លាក់គ្រាប់បែក JH-7 បួនគ្រឿង។

ក្រសួងបន្ថែមថា កងកម្លាំងប្រដាប់អាវុធបានតាមដានស្ថានភាព និងឆ្លើយតបដោយការបញ្ជូនកងល្បាតតាមអាកាស ចេញការព្រមានតាមវិទ្យុ និងការដាក់ពង្រាយប្រព័ន្ធមីស៊ីលការពារដែនអាកាស។

គួរបញ្ជាក់ជាថ្មី ស្ថានការណ៍ជុំវិញកោះតៃវ៉ាន់កាន់តែតានតឹង បន្ទាប់ពីដំណើរទស្សនកិច្ចរបស់ប្រធានសភាអាមេរិក លោកស្រី Nancy Pelosi ទៅកាន់កោះនេះ ចាប់ពីថ្ងៃទី២ ដល់ថ្ងៃទី៣ខែសីហា៕